فرمان الہی
نماز کے اوقات
اسٹرنگز بینڈ کے رکن اور نامور کمپوزر و گلوکار بلال مقصود نے اپنے مداحوں کو ایک اہم انکشاف سے آگاہ کیا ہے۔
فوٹو اور ویڈیو شیئرنگ ایپ انسٹاگرام پر بلال مقصود نے نامور گٹارسٹ فراز انور اور اسٹرنگز بینڈ کے رکن فیصل کپاڈیا کے ساتھ اپنی ماضی کی یادگار تصاویر پوسٹ کیں۔
تصاویر پوسٹ کرتے ہوئے بلال مقصود نے اپنے مداحوں کو ایک اہم انکشاف سے آگاہ کرتے ہوئے بتایا کہ ’ماضی میں ہم نے فراز انور کو پیشکش کی تھی کہ وہ ایک لیڈ گٹارسٹ کی حیثیت سے اسٹرنگز بینڈ میں شامل ہوجائیں۔‘
بلال مقصود نے بتایا کہ ’انور فراز نے پیشکش قبول کی اور اسٹرنگز بینڈ میں شامل ہوگئے، اُس کے بعد ہم نے ملکر ایک ٹی وی شو کے لیے گانا ریکارڈ کیا اور یہ تصاویر اُسی گانے کے شوٹ کی ہیں۔‘
گلوکار نے بتایا کہ ’اُس گانے کے بعد فراز انور ہمارے بینڈ سے بور ہوگئے اور اُنہوں نے اسٹرنگز بینڈ کو الوداع کہہ دیا۔‘
دوسری جانب فراز انور نے اپنے انسٹاگرام اکاؤنٹ پر بلال مقصود کی پوسٹ کا اسکرین شاٹ شیئر کرتے ہوئے اِس خصوصی پوسٹ کے لیے گلوکار کا شکریہ ادا کیا۔
فراز انور نے مزاحیہ انداز میں بلال مقصود سے سوال کیا کہ ’کیا واقعی میں نے اسٹرنگز بینڈ چھوڑا تھا؟‘
واضح رہے کہ فراز انور کا شمار پاکستان کے مقبول ترین گٹارسٹ میں ہوتا ہے اُنہوں نے سجاد علی سمیت کئی نامور گلوکاروں کے ساتھ کام کیا ہے۔
