فرمان الہی
نماز کے اوقات
پاکستان شوبز ستاروں کی جانب سے یوٹیوب پر پابندی کے خلاف شدید برہمی کا اظہار کیا گیا ہے۔
مائیکرو بلاگنگ سائٹ ٹوئٹر پر مہوش حیات نے ٹوئٹ کرتے ہوئے سوالیہ انداز میں لکھا کہ ’کیا واقعی یوٹیوب پر پابندی عائد کی جارہی ہے؟ کیا اس کے بعد ٹوئٹر، انسٹاگرام، نیٹ فلیکس، فیس بُک اور یہاں تک کے واٹس اپ پر بھی پابندی لگائی جائے گی؟‘
مہوش حیات نے شدید غصےکا اظہار کرتے ہوئے کہا کہ ’آزادی رائے ہر معاشرے کا ایک بنیادی اصول ہے اور پاکستان میں تو سوشل میڈیا چیک اینڈ بیلنس فراہم کرتا ہے جو کہ مین اسٹریم پر نہیں ہوتا ہے۔‘
اداکارہ نے کہا کہ ’میرا خیال یہ ہے کہ ترقی پسند ریاستوں کو اس طرح کی پابندی کا سہارا لینے کی ضرورت ہی نہیں ہے۔‘
معروف اداکار اعجاز اسلم نے بھی یوٹیوب پر پابندی سے متعلق ٹوئٹر پراپنا پیغام جاری کرتے ہوئے سوالیہ انداز میں لکھا کہ ’ہم نامناسب مواد پوسٹ کرنے والے اکاؤنٹس کو بند کیوں نہیں کرسکتے۔‘
اعجاز اسلم نے لکھا کہ ’اِس طرح پوری قوم کو ایک پلیٹ فارم سے محروم کرنا انتہائی شرم کی بات ہے۔‘
زارا نور عباس نےاپنے ٹوئٹر پیغام میں کہا کہ ’پاکستان میں مواد تخلیق کرنے والوں اور فن کاروں کی ایک بہت بڑی صنعت موجود ہے جو کہ یوٹیوب کے ذریعے کام کر رہی ہے۔‘
اداکارہ نے کہا کہ ’نامناسب مواد پر پابندی عائد کرنا ایک بہترین آئیڈیا ہے لیکن یوٹیوب پر پابندی لگانے سے پیشہ ور افراد میں منفی سوچ ہی پیدا ہوگی۔‘
زارا نور عباس نے اپنے اگلے ٹوئٹ میں لکھا کہ ’ہم میں سے بہت لوگ ایسے ہیں جو عالمی وبا کورونا وائرس کی وجہ سے اپنے نوکریاں کھو بیٹھے ہیں۔‘
اداکارہ نے کہا کہ ’اگر یوٹیوب پر پابندی لگ گئی تو مزید افراد بے روزگار ہوجائیں گے اور اگر بے روزگاری کا سلسلہ یوں ہی جاری رہا تو اگلی بڑی وبائی بیماری ذہنی غیر فعالیت ہوسکتی ہے جو مزید جرائم کا سبب بنے گی اور منفی پن کا باعث ہوگی۔‘
واضح رہے کہ گزشتہ روز ہی سپریم کورٹ نے سوشل میڈیا اور یوٹیوب پر قابل اعتراض مواد کا نوٹس لیا ہے۔
