کراچی: ون وے کی خلاف ورزی، سائیکل سوار کا چالان کٹ گیا

کراچی کے علاقے کلفٹن میں ٹریفک پولیس آفیسر نے ون وے کی خلاف ورزی کرنے والے ایک محنت کش غریب سائیکل سوار کا موٹرسائیکل چالان کوڈ کے تحت 500 روپے جرمانہ کر دیا۔

جاری کیے گئے چالان میں سائیکل سوار پر 20 روپے ٹیکس بھی عائد کیا گیا ہے تاہم غربت کی وجہ سے سائیکل سوار جرمانہ ادا نہ کر سکا تو ٹکٹنگ آفیسر کو خود ہی جرمانہ ادا کرنا پڑا۔

’جیو نیوز‘ کو موصول ہونے والی کراچی ٹریفک پولیس کے ای چالان کی سلپ کے مطابق محمد اقبال شاہد نامی سائیکل سوار پر ون وے کی خلاف ورزی کرنے پر 500 روپے جرمانہ کیا گیا۔

آفیسر کی جانب سے اس تمام کارروائی کی بنائی گئی ویڈیو میں نظر آ رہا ہے کہ پھیری لگا کر مختلف اقسام کی چیزیں فروخت کرنے والے شخص کو پولیس کی گاڑی کے عملے نے روک رکھا ہے۔

کراچی: وزیراعلیٰ کا پروٹوکول توڑنے کا الزام، شہری پر جرمانہ

کراچی میں ٹریفک پولیس نے وزیراعلیٰ سندھ سید مراد علی شاہ کا پروٹوکول توڑنے کا الزام لگا....

مذکورہ سائیکل سوار پھیری والے کو ٹریفک پولیس کلفٹن کے ٹکٹنگ آفیسر غلام علی جمالی نے رانگ وے جاتے ہوئے روکا اور اس کا شناختی کارڈ طلب کر کے اسے پانچ سو روپے جرمانہ کیا گیا۔

موصول ہونے والی ای سلپ میں سائیکل سوار کو ٹریفک پولیس کے جرمانے کے کوڈ 70 کے تحت چارج کیا گیا جو کہ موٹر سائیکل سوار کو جرمانے کی دفعہ ہے۔

اس سلسلے میں کلفٹن ٹریفک سیکشن کے اسسٹنٹ سب انسپکٹر جاوید کا کہنا ہے کہ سائیکل کا فائن کوڈ نہ ہونے کی وجہ سے موٹر سائیکل کوڈ کے تحت چالان کی سلپ نکالی گئی۔

موصول ہونے والی ویڈیو میں دیکھا جا سکتا ہے کہ آفیسر سائیکل سوار کو 500 روپے جرمانے کا بتاتا ہے تو غریب پھیری والے کے چہرے کا رنگ اڑ جاتا ہے، وہ کہتا ہے کہ ’’گھر پر کھانے کو آٹا نہیں ہے، میں 500 روپے کہاں سے لاؤں؟‘‘

یہ بھی پڑھیئے: 6382 گاڑیوں کے چالان اور ڈرائیوروں پر جرمانہ

آفیسر کہتا ہے کہ غلط سمت جانے سے جانی نقصان ہوتا ہے جس پر سائیکل سوار معافی مانگتا ہے۔

ٹکٹنگ آفیسر کی کوشش کے باوجود سائیکل سوار چالان کی سلپ وصول نہیں کرتا۔

کلفٹن ٹریفک سیکشن کے مطابق یہ جرمانہ ٹکٹنگ آفیسر غلام علی جمالی نے خود ادا کیا اور سائیکل سوار کو وارننگ کے بعد جانے دیا۔