فرمان الہی
نماز کے اوقات
مقبوضہ کشمیر کو پاکستان کے نقشے کا حصہ بنادیا گیا ہے، وفاقی کابینہ کی جانب سے نئے نقشے کی منظوری دے دی گئی ہے۔
ذرائع نے بتایا کہ اس نئے نقشے کو اقوام متحدہ میں پیش کیا جائے گا۔
وفاقی کابینہ اجلاس میں پاکستان کے نئے سیاسی نقشے کی تقریب رونمائی پر خطاب کرتے ہوئے وزیراعظم عمران خان کا کہنا تھا کہ ایک دن یہی نقشہ پاکستان کا نقشہ ہوگا۔
وزیراعظم نے پوری قوم کو پاکستان کے نئے نقشے پر مبارکباد دی اور آج کے دن کو تاریخی قرار دیا۔
ان کا کہنا تھا کہ نیا سیاسی نقشہ آج دنیا کے سامنے پیش کر رہے ہیں، وفاقی کابینہ نے نئے سیاسی نقشے کی منظوری دے دی ہے۔
انھوں نے کہا کہ تمام کشمیر ی قیادت اور ملکی قیادت نے اس نقشے کی تائید کی ہے۔
وزیرِاعظم نے کہا کہ کشمیر کا حل اقوامِ متحدہ کی قراردادوں میں ہے۔
انھوں نے یہ بھی کہا کہ کشمیر پاکستان کا حصہ بنے گا، یہ نقشہ پہلا قدم ہے۔
عمران خان کا کہنا تھا کہ بھارت نے 5 اگست 2019 کو ظلم کیا اور کشمیریوں کا قانونی حق ختم کیا، بھارت چاہتا ہے کہ کشمیری اپنے ہی علاقوں میں اقلیت بن کر رہ جائیں۔
وزیراعظم نے کہا کہ میں بہت خوش ہوں کیونکہ بچپن سے کشمیریوں کی آزادی کا سنتے آرہے ہیں۔
انھوں نے کہا کہ میرا زندگی کا تجربہ ہے کہ اپنی منزل پر پہنچنے سے پہلے خواب ضرور دیکھنا چاہیے۔ بچپن میں کرکٹر بننا چاہا اور پھر بن کر دکھایا، اسی طرح شوکت خانم کا بھی خواب دیکھا۔
عمران خان نے کہا کہ ہم اقوام متحدہ کو یاد کرواتے رہیں گے کہ آپ نے جو وعدہ کیا وہ پورا کریں۔
ان کا کہنا تھا کہ انشاء اللّٰہ مجھے بھروسہ ہے کہ ہم اپنی منزل پر ایک دن پہنچ جائیں گے۔
ہمارے بزرگوں کے خواب کو وزیرِاعظم نے اس نقشے میں پِرو دیا، وزیر خارجہ
اس موقع پر وفاقی وزیرِ خارجہ شاہ محمود قریشی کا کہنا تھا کہ آج کے بعد یہ نقشہ ملک بھر میں استعمال ہوگا۔
شاہ محمود قریشی کا کہنا تھا کہ سیاچن کل بھی ہمارا تھا آج بھی ہمارا ہے۔
ان کا کہنا تھا کہ سر کریک کا جو دعوٰی بھارت کرتا تھا نئے نقشے میں اس کی نفی کردی گئی ہے۔
انھوں نے یہ بھی کہا کہ بھارت بڑی چالاکی سے پاکستان کا معاشی زون ہڑپ کرنے کی کوشش کر رہا تھا۔
مغربی سرحد سے متعلق ان کا کہنا تھا کہ اب فاٹا خیبر پختونخوا کا علاقہ بن چکا ہے اور افغان سرحد واضح کردی گئی ہے۔
وزیر خارجہ نے دوٹوک الفاظ میں کہا کہ ہماری منزل سری نگر ہے۔
ان کا کہنا تھا کہ پوری قوم کو پاکستان کا نیا نقشہ مبارک ہو، پہلی مرتبہ وہ نقشہ منظور ہوا ہے جو پوری قوم کی نمائندگی کرتا ہے۔
شاہ محمود قریشی نے کہا کہ سلامتی کونسل کی قراردادوں کے مطابق اس مسئلے کا حل نکلے گا اور یہ نقشہ اس حل کی عکاسی کرتا ہے۔
ان کا کہنا تھا کہ آج پوری قوم پاکستان کے اس سیاسی نقشے کی حمایت میں ہے، سیاسی اور کشمیری قیادت کو بھی اس نقشے کے حوالے سے اعتماد میں لیا گیا۔
وزیر خارجہ نے کہا کہ پاکستانی قوم کل بھی کشمیر کے ساتھ تھی اور آج بھی کشمیر کے ساتھ ہے۔
ان کا کہنا تھا کہ ہماری منزل وہ خواب ہے جو ہمارے بزرگوں نے دیکھا، ہمارے بزرگوں کے خواب کو وزیرِاعظم نے اس نقشے میں پِرو دیا ہے۔
سینیٹ میں کشمیر سے متعلق خصوصی اجلاس کل ہوگا
دوسری جانب سینیٹ کا کشمیر کے حوالے سے خصوصی اجلاس 5 اگست کو صبح ساڑھے 10بجے ہوگا۔
ذرائع کا کہنا ہے کہ سینیٹ اجلاس میں کشمیر سے اظہارِ یکجہتی کی تقاریر کی جائیں گی۔
سینیٹ اجلاس میں صدر مملکت ڈاکٹر عارف علوی بھی شرکت کریں گے۔
