فرمان الہی
نماز کے اوقات
پاکستان پیپلز پارٹی (پی پی پی) کے رہنما سینیٹر رحمان ملک کا کہنا ہے کہ آصف علی زرداری اور خورشید شاہ کے ساتھ زیادتی ہو رہی ہے، پیش گوئی کرتا ہوں کہ بلاول بھٹو زرداری جلد وزیراعظم بنیں گے۔
اسلام آباد میں پیپلز پارٹی کی جشن آزادی کی تقریب سے خطاب کرتے ہوئے رحمان ملک نے کہا کہ آج آزادی کے جشن کے موقع پر کشمیریوں کو نہیں بھولنا چاہیے، ایک سال ہوگیا کشمیری لاک ڈاؤن میں ہیں، افسوس حکومت پاکستان نے کچھ نہیں کیا۔
رحمان ملک نے کہا کہ سب کو معلوم ہے کہ مقبوضہ کشمیر پر مودی کس طرح کا ظلم کر رہا ہے، میں مودی کو چیف دہشت گرد کہتا ہوں، وہ آر ایس ایس کا ٹرین شدہ ہے۔
انہوں نے کہا کہ پاکستان کو اصل آزادی تب ملے گی جب آئی ایم ایف کی پابندیوں کو توڑا جائے گا۔
پی پی رہنما نے کہا کہ کورونا وائرس پاکستان میں ابھی ختم نہیں ہوا، حکومت نے ٹیسٹنگ ختم کردی ہے۔
رحمان ملک نے کہا کہ عمران خان سے سوال ہے وہ سندھ میں گورنر راج کی بات کیوں کرتے ہیں۔ انہوں نے خبردار کیا کہ سندھ میں گورنر راج کی کوشش پاؤں پر کلہاڑی مارنے کے مترادف ہوگی۔
انہوں نے کہا کہ بھارت نے ایک ملین ڈالر کراچی کو نقصان پہنچانے کیلئے مختص کیا ہے۔
انہوں نے کہا کہ آج آئی ایم ایف کو پیسا واپس دینے سے منع کردیں تو وہ کچھ نہیں بگاڑ سکتا، جبکہ ایف اے ٹی ایف پاکستان کے خلاف ریاستی دہشت گردی ہے۔
