آپ آف لائن ہیں
منگل 2ربیع الاول 1442ھ20؍اکتوبر2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

1965 کی جنگ... افواج پاکستان کی شجاعت کی لازوال داستان

1965ء کی جنگ میں افواج پاکستان اور قوم کا جوش و ولولہ اور یکجہتی کا تصور گویا روح کو سرشار کردیتا ہے، دل وطن کی خاطر مر مٹنے کے جذبے سے لبریز ہوجاتا ہے۔ ایک طرف جنگِ ستمبر کا تذکرہ دلوں کو گرماتا اور ایمان ویقین کو تازہ کردیتا ہے تو دوسری جانب لازوال قربانیوں کی داستانیں آنکھیں نم کردیتی ہیں۔ تاریخ عالم میں پاکستان کو ناقابلِ تسخیر ثابت کرنے والی اس پاک بھارت جنگ کے چیدہ چیدہ نکات قارئین کی نذر کیے جارہے ہیں۔

جنگ کا آغاز

جنگ ستمبر1965ء کا سبب بھی بھارت کے زیرِ تسلط مقبوضہ کشمیر تنازعہ تھا۔ تقسیم ہند کے بعد سے ہی بھارت نے بین الاقوامی برادری کے سامنے کشمیر سے متعلق کیے گئے اپنے وعدوں کی خلاف ورزی کی اور مسلسل ایسے اقدامات کیے جو کشمیر کی بین الاقوامی سطح پر متنازعہ حیثیت کے بالکل برعکس تھے۔ ایک طرف بھارت کا بین الاقوامی برادری کے سامنے کشمیر میں استصواب رائے کا وعدہ تو دوسری جانب مقبوضہ کشمیر کو بھارت کے نندا کمیشن رپورٹ پر عملدرآمد کی صورت وفاقی ڈھانچے میں شامل کرکے بھارت کا اٹوٹ انگ قرار دینا اور پھر رن آف کچھ میں پاکستانی علاقے پربھارت کا حملہ، یہ تمام عوامل ایسے تھے جن کے باعث پاکستان کا جوابی رد عمل ہر صورت لازمی تھا۔

جارحیت کا ارتکاب

21فروری1965ءکو بھارت نے پاکستانی ٹروپس کو کانجر کوٹ سے باہر نکالنے کا فیصلہ کیا جوکہ رن آف کچھ میں ایک بہت پرانا قلعہ اور پاک بھارت سرحد پر واقع ہے۔ اس مقام پر پاکستان سے پنجہ آزمائی کے دوران منہ کی کھانے کے بعد بھارت نے فیصلہ کیا کہ وہ اپنی اس شکست کا بدلہ لے گا۔ یوں 6ستمبر 1965ء کے روز بھارت نے رات کی تاریکی میں میجر جنرل نرنجن پرشاد کی قیادت میں ٹینکوں کے 25ویں ڈویژن اور توپ خانے کی مدد سے لاہور پر 3اطراف سے حملہ کردیا، دشمن یہ سوچ کر پاکستان پر حملہ آور ہوا تھا کہ لاہور پر قبضہ جمانے میں کامیاب ہوجائے گا۔ 

بھارتی جرنیل صبح کا ناشتہ لاہور میں کیے جانے کا سوچے بیٹھے تھے مگر انھیں کیا معلوم تھا کہ کچھ ہی دیرمیں پاک فوج کے جانباز انھیں تارے دکھانے والے ہیں۔ دشمن کے ناپاک عزائم خاک میں ملانے کے لیے پہلے پہل اس کے لاہور کی جانب بڑھتے قدم روکنے تھے، جس کے لیے ستلج رینجرز کے نوجوانوں نے نہ صرف جانوں کے نذرانے پیش کیے بلکہ بی آر بی نہر کا پل تباہ کرکے دشمن کا لاہور میں پہنچنا ناممکن بنادیا، اس تمام تر صورتحال کو یقینی بنانا کسی طور معجزے سے کم نہ تھا ۔

چونڈہ، بھارتی ٹینکوں کا قبرستان

تاریخ نویس ستمبر کی پاک بھارت جنگ میں چونڈہ (سیالکوٹ) میں لڑی جانے والی ٹینکوں کی لڑائی کو دوسری جنگ عظیم کے بعد ٹینکوں کی سب سے بڑی جنگ قرار دیتے ہیں۔ طاقت کے نشے میں چُور بھارت نے پاک فوج کی توجہ لاہور محاذ سے ہٹانے کے لئے600ٹینکوں اور ایک لاکھ فوج کے ساتھ سیالکوٹ میں چارواہ، باجرہ گڑھی اورنکھنال کے مقام پر حملہ کردیا۔ 

لیکن پاک فوج کے جوان اپنے جسموں پر بم باندھ کر ٹینکوں کے آگے لیٹ گئے اور چونڈہ کے محاذ کو دشمن کے ٹینکوں کا قبرستان بنادیا، سینکڑوں ٹینک ملبے کا ڈھیر بن گئے۔ چونڈہ کے مقام پر پاک فوج کی قیادت جنرل ٹکا خاں کررہے تھے، جنھوں نےہمت وبہادری اور شجاعت کے ذریعے نہ صرف سیالکوٹ کو بچا لیا بلکہ بھارتی کمانڈروں کی جانب سے پاکستان کی لائف لائن جی ٹی روڈ کو کاٹنے کی خواہش بھی ناکام بنا دی۔

پاک فضائیہ کا تاریخی کردار

دوسری جانب ملکی دفاع کے لیے پاک فضائیہ کا جذبہ بھی کسی طور کم نہ تھا، پاک فضائیہ کے شاہینوں نے اس لڑائی میں لازوال کردار ادا کیا ۔ پاک فضائیہ نے6ستمبرکو بھارت کے فضائی اڈوں پٹھان کوٹ، آدم پور اور ہلواڑہ پر بھر پور انداز میں حملے کئے۔ پٹھانکوٹ میں پاک فضائیہ نے بھارت کے دس طیارے تباہ کیے اور متعدد کو نقصان پہنچایا۔ 1965ء کی 17روزہ جنگ میں پاک فضائیہ کے بہادر سپوتوں کی بدولت پی اے ایف نے مجموعی طور پر 35طیاروں کو فضااور 43کو زمین پر تباہ کیا جبکہ 32بھارتی طیاروں کو طیارہ شکن گنوں نے نشانہ بنایا۔ اس طرح مجمو عی طورپر بھارت کے 110طیارے تباہ ہو ئے اور پاکستان کے صرف 19طیارے اپنے ملک کے دفاع میں کام آئے۔

سمندری حدود کی حفاظت

جنگ کے آغاز کے دوسرے دن 7ستمبر کو اپنے ساحل کے دفاع کے لیے پاک بحریہ کے جنگی جہاز حفاظتی گشت پر مامور تھے کہ اس دوران نیول ہیڈکوارٹرز کی جانب سے ایک پیغام موصول ہوا، جس میں ہدایت کی گئی کہ جتنی تیزی سے ممکن ہو جنوبی دوارکا سے مغرب میں 120میل کی طرف بڑھیں اور شام 6بجے تک پوزیشن سنبھال لیں۔دوارکا میں بھارتی بحریہ کا ریڈاراسٹیشن اورفضائی اڈہ تھا۔ 

پاک بحریہ نے دفاعی جنگ لڑنے کی بجائے جارحانہ حکمت عملی اپنانے کا فیصلہ کیا۔ ساڑھے چار منٹ تک مسلسل بمباری کرکے50،50راؤنڈز فائر کیے، مطلوبہ ہدف تباہ کیا اور دشمن کو سنبھلنے کا موقع ہی نہ دیا۔ اس کے علاوہ رن وے کو بھی مکمل طور پر تباہ کر دیا گیا، جب کہ انفرااسٹرکچر اور سیمنٹ فیکٹری کو بھی راکھ کا ڈھیر بنا دیا گیا۔

جنگ ستمبر1965ء میں اپنے دشمن کے مقابلے میں چھوٹے اور کم وسائل والے غیور اور متحد ملک نے دشمن کے جنگی حملوں کا اس پامردی اور جانثاری سے مقابلہ کیا کہ اس کے سارے عزائم خاک میں مل گئے۔ اس لڑائی میں جنگی سازو سامان کی کم تعداد کے باوجود پاکستانی افواج اور قوم نے اپنے جوش، ولولے اور جذبہ شہادت سے ثابت کیا کہ وہ اپنی مقدس سرزمین کے چپے چپے کا دفاع کرنے کی ہر ممکن صلاحیت رکھتی ہیں اور انشاءاللہ آئندہ بھی ہمیشہ رکھیں گی۔