بین الافغان مذاکرات کا آغاز کل ہوگا

افغانستان میں امن کے لیے بین الافغان مذاکرات کل شروع ہوں گے، امریکا کے وزیر خارجہ مائیک پومپیو نے تاریخ کا اعلان کیے جانے کا خیر مقدم کیا ہے۔

قطری حکومت نے اعلان کیا ہے کہ بین الافغان مذاکرات ہفتے سے دوحہ میں ہوں گے، فریقوں کے درمیان یہ اہم براہ راست مذاکرات افغانستان میں دائمی امن لانے کی جانب پیشقدمی کی علامت ہیں۔

مائیک پومپیو اور ملا برادر کے درمیان ویڈیو کانفرنس

امریکی وزیر خارجہ مائیک پومپیو اور قطر میں طالبان کے سیاسی دفتر کے سربراہ ملا برادر کے درمیان ویڈیو کانفرنس میں افغان امن عمل اور قیدیوں کی رہائی کے معاملے پر تبادلہ خیال کیا گیا۔

مذاکرات میں شرکت کےلیے افغان حکومت کی ٹیم آج روانہ ہوگی، طالبان وفد کے ترجمان محمد نعیم وردک کے مطابق یہ افتتاحی میٹنگ ہے۔

امریکی وزیر خارجہ مائیک پومپیو کا کہنا ہے کہ یہ تاریخی لمحہ اور افغانستان کے لیے بہترین موقع ہے کہ وہ 40 برس سے جاری جنگ اور خونریزی ختم کرے۔

افغان حکومت نے طالبان کے چھ اہم قیدی رہا کر دیے

بین الافغان مذاکرات کی راہ میں حائل ایک اور رکاوٹ دور ہوگئی، افغان حکومت نے طالبان کے چھ اہم قیدیوں کو رہا کر دیا ۔

واضح رہے کہ مذاکرات کی تاریخ کا اعلان کیے جانے سے پہلے طالبان کے وہ 6 قیدی کابل سے دوحہ منتقل کردیے گئے ہیں جن کی رہائی کا طالبان نے مطالبہ کیا تھا مگران کی رہائی کی فرانس اور آسٹریلیا نے مخالفت کی تھی۔