فرمان الہی
نماز کے اوقات
پاکستان پیپلز پارٹی کے چیئرمین بلاول بھٹو زرداری کا کہنا ہے کہ موجودہ حکومتی انتقام کے خلاف آج بھی جمہوری قوتوں کے ساتھ کھڑے ہیں، تاریخ میں اتنا نا اہل اور نالائق وزیرِ اعظم نہیں ملا۔
کراچی بار سے خطاب کرتے ہوئے پاکستان پیپلز پارٹی کے چیئرمین بلاول بھٹو زرداری نے کہا کہ سلیکٹڈ حکومت کے دن گنے جا چکے، الزامات سے گھبرانے والے نہیں، گرفتاری کی دھمکیاں نئی نہیں۔
انہوں نے کہا کہ پاکستانی عوام کے لیے تحریک چلانے نکلے ہیں، وکلاء کا تعاون درکار ہے، ہم نا اہل وزیرِ اعظم کو گھر بھیج دیں گے۔
بلاول بھٹو زرداری کا کہنا ہے کہ ہم 18 اکتوبر کو مزارِ قائد پر تاریخی جلسہ کریں گے، پاکستان پیپلز پارٹی نے آئین جمہوریت کی سربلندی کی تحاریک چلائی ہیں۔
انہوں نے کہا کہ گرفتاریاں پیپلز پارٹی کے لیے نئی بات نہیں ہیں، جب تک وکلاء ہمارے ساتھ کھڑے ہیں ہمیں کسی کی ضرورت نہیں۔
چیئرمین پی پی پی نے کہا کہ حقیقی جمہوریت کے لیے جدوجہد کرنی ہو گی، جب تک آزاد نہیں ہوں گے، پارلیمان ربڑ اسٹیمپ رہے گی، مسائل حل نہیں ہوں گے۔
ان کا کہنا ہے کہ جب تک میڈیا اور پارلیمنٹ آزاد نہیں ہو گی، حقیقی جمہوریت نہیں آ سکتی، ہم سانحہ کار ساز کے موقع پر 18 اکتوبر کو کراچی سے آواز اٹھائیں گے۔
چیئرمین پیپلز پارٹی بلاول بھٹو زرداری کا کہنا ہے کہ عوام سے اپیل کرتے ہیں کہ آپ نے ہمارا ملک بھر میں ساتھ دینا ہے، اگر آپ ہمارا ساتھ دیں گے تو ہم اس سیلیکٹڈ حکومت کا خاتمہ کر دیں گے۔
انہوں نے مزید کہا کہ جب میڈیا آزاد تھا تو وہ کمزور کی آواز تھا، ہم تاریخی مہنگائی کا سامنا کر رہے ہیں مگر میڈیا نہیں دکھا رہا، صوبے کا حق ہمیں این ایف سی کی مد میں نہیں دیا جاتا۔
چیئرمین پاکستان پیپلز پارٹی کا یہ بھی کہنا ہے کہ میں انسانی حقوق کا تحفظ کرنے والوں کے ساتھ ہوں، خورشید شاہ صاحب آج بھی جیل میں ہیں، لیڈر آف اپوزیشن آج بھی گرفتار ہیں۔
