ملک میں اب تک کورونا وائرس کے 40 لاکھ 9 ہزار ٹیسٹ ہوئے

پاکستان میں کورونا وائرس کے نئے کیسز اور اس سے اموات میں مسلسل کمی جبکہ اس سے شفایاب ہونے والوں میں اضافہ ہو رہا ہے جس کی وجہ سے ملک کورونا مریضوں کی تعداد کے حوالے سے ممالک کی فہرست میں 23 ویں نمبر پر آ گیا ہے۔

ملک بھر میں گزشتہ 24 گھنٹوں کے دوران 33 ہزار 901 کورونا وائرس کے ٹیسٹ کیے گئے جبکہ اب تک کُل 40 لاکھ 9 ہزار 497 کورونا وائرس کے ٹیسٹ کیے جا چکے ہیں۔

نیشنل کمانڈ اینڈ آپریشن سینٹر کے مطابق گزشتہ 24 گھنٹوں کے دوران 659 نئے کورونا وائرس کے کیسز سامنے آ گئے، مزید 7 افراد اس موذی وباء کے سامنے زندگی کی بازی ہار گئے جبکہ 440 مریض اس بیماری سے شفایاب ہو گئے۔

پاکستان میں کورونا وائرس کے کیسز کی تعداد 3 لاکھ 21 ہزار 877 ہو چکی ہے، جبکہ اس موذی وباء سے جاں بحق افراد کی کُل تعداد 6 ہزار 621 تک جا پہنچی ہے۔

کورونا وائرس کی تشخیص 5منٹ میں ممکن

برطانوی سائنس دانوں نے کورونا وائرس سے نجات اور اس سے بچاو کے سلسلے میں ایسا آلہ تیار کیا ہے جس کی مدد سے 5 منٹ میں کورونا وائرس کی تشخیص ممکن ہوسکے گی۔

کورونا وائرس کے ملک بھر میں 9 ہزار 421 مریض اب بھی اسپتالوں، قرنطینہ مراکز اور گھروں میں آئسولیشن میں ہیں، جن میں سے 529 کی حالت تشویش ناک ہے جبکہ 3 لاکھ 5 ہزار 835 مریض اس بیماری سے صحت یاب ہو چکے ہیں۔

سندھ میں کورونا وائرس کے مریضوں کی تعداد دوسرے صوبوں سے زیادہ 1 لاکھ 41 ہزار 249 ہو چکی ہے، جبکہ یہاں اس موذی وائرس سے اموات بھی دیگر صوبوں سے بڑھ کر 2 ہزار 568 ہو گئیں۔

پنجاب میں کورونا وائرس کے اب تک 1 لاکھ 1 ہزار 367 مریض سامنے آئے ہیں جبکہ اس سے ہلاکتیں 2 ہزار 279 ہو گئیں۔

خیبر پختون خوا میں کورونا وائرس کے مریضوں کی تعداد 38 ہزار 521 ہو چکی ہے جبکہ اس سے اموات 1 ہزار 265 ہو گئیں۔

وفاقی دارالحکومت اسلام آباد میں 17 ہزار 781 کورونا وائرس سے متاثرہ مریض اب تک سامنے آئے ہیں جبکہ 193 افراد اس وباء سے جان کی بازی ہار چکے ہیں۔

کورونا وائرس کے بلوچستان میں 15 ہزار 621 مریض اب تک رپورٹ ہوئے ہیں جہاں 146 افراد اس مرض سے انتقال کر چکے ہیں۔

گِلگت بلتستان میں 4 ہزار 16 کورونا وائرس کے مریض سامنے آئے ہیں جبکہ اس سے 90 افراد جاں بحق ہوئے ہیں۔

آزاد جموں و کشمیر میں کورونا وائرس کے اب تک 3 ہزار 322 مریض رپورٹ ہوئے ہیں جبکہ اس وائرس سے 80 مریض وفات پا چکے ہیں۔