ٹک ٹاک بندش: مظہر عباس، جاوید جبار عدالتی معاونین مقرر

17 اکتوبر ، 2020

اسلام آباد ہائی کورٹ نے ٹک ٹاک کی بندش کا فیصلہ فوری معطل کرنے کی درخواست سماعت کے لیے منظور کر لی۔

اسلام آباد ہائی کورٹ نے ٹک ٹاک کی بندش کا فیصلہ فوری معطل کرنے کی درخواست پر پی ٹی اے کو نوٹس جاری کر دیا جبکہ پاکستان فیڈرل یونین آف جرنلسٹس (پی ایف یو جے) کے صدر مظہر عباس، وائس چیئرمین پاکستان بار کونسل اور سابق وزیرِ اطلاعات جاوید جبار کو عدالتی معاونین مقرر کرنے کا حکم نامہ جاری کر دیا۔

اسلام آباد ہائی کورٹ کے چیف جسٹس اطہر من اللّٰہ نے 3 صفحات پر مشتمل تحریری حکم نامہ جاری کر دیا۔

عدالتِ عالیہ کا ٹک ٹاک کی بندش کے پی ٹی اے کے فیصلے کے خلاف درخواست پر سماعت کا تحریری حکم نامہ جاری کرتے ہوئے کہنا ہے کہ کیوں نہ کیس کے حتمی فیصلے تک پی ٹی اے کا فیصلہ معطل کر دیا جائے؟

اسلام آباد ہائی کورٹ نے تحریری حکم نامے میں کہا ہےکہ پی ٹی اے آئندہ سماعت پر عدالت میں پیش ہونے کے لیے سینئر افسر مقرر کرے۔

تحریری حکم نامے میں عدالت کا کہنا ہے کہ عدالتی احکامات پر عمل نہ کرنے کی وجہ سے کیوں نہ پی ٹی اے کے خلاف کارروائی کی جائے؟

اسلام آباد ہائی کورٹ نے اپنے تحریری حکم نامے میں کہا ہے کہ درخواست گزار کے وکیل نے جو سوالات اٹھائے ہیں وہ توجہ طلب ہیں، درخواست سماعت کیلئے منظور کی جاتی ہے۔

عدالتِ عالیہ نے پی ایف یو جے کے صدر مظہر عباس، وائس چیئرمین پاکستان بار کونسل اور سابق وزیر ِاطلاعات جاوید جبار کو عدالتی معاونین مقرر کرتے ہوئے کہا ہے کہ معاونین پی ٹی اے کے اختیارات کے مبینہ غلط استعمال پر عدالت کی معاونت کریں۔

عدالت نے معاونین کو ہدایت کی ہے کہ بنیادی آئینی حقوق کی خلاف ورزی کے سوال پر عدالت کی معاونت کریں۔

اسلام آباد ہائی کورٹ میں کیس کی مزید سماعت 23 اکتوبر کو ہو گی۔

تازہ ترین