آپ آف لائن ہیں
جمعرات4؍ ربیع الاوّل 1442ھ 22اکتوبر2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

اعلان جنگ ہوچکا، ن لیگ پر پابندی لگائی جائے، اب نواز شریف کا سیاسی جنازہ آئے گا، شیخ رشید

 اب نواز شریف کا سیاسی جنازہ آئے گا، شیخ رشید


لاہور، اسلام آباد (نیوز ایجنسیاں، جنگ نیوز) وفاقی وزیر ریلوے شیخ رشید نے پاکستان مسلم لیگ (ن) کے قائد نواز شریف پر سخت تنقید کرتے ہوئے کہا کہ ʼاعلان جنگ ہوچکا ہے اور نواز شریف کیساتھ وہی ہوگا جو الطاف حسین کے ساتھ ہوا، ن لیگ پر فوری پابندی لگائی جائے۔

نواز شریف کا سیاسی جنازہ ہی پاکستان آئیگا انکی سیاست نہیں آئیگی، وفاقی وزیر اطلاعات و نشریات سینیٹر شبلی فراز نے واضح کیا کہ اداروں کیخلاف ہرزہ سرائی کو برداشت نہیں کیا جائیگا۔

 اپوزیشن کا شو فلاپ ہوگیا، جبکہ وفاقی وزیر سائنس فواد چوہدری کا کہنا ہے کہ عدلیہ اور فوج کو نشانہ بنانا ریاست پر حملہ ہے، نواز شریف خطرناک بیانیے پر کام کررہے ہیں ، یہ بیانیہ ناکام ہوگا،مولانا فضل الرحمٰن نے خالی کرسیوں سے خطاب کیا ۔ 

لاہور میں میڈیا سے گفتگو کرتے ہوئے شیخ رشید نواز شریف ایک اشتہاری مجرم ہے، بھارت میں الطاف حسین کو اتنی کوریج نہیں مل رہی جتنی گزشتہ روز نواز شریف کو ملی ہے، الطاف حسین نمبر دو کا نام نواز شریف ہے۔انہوں مزید کہا کہ ʼشہباز شریف میری پارٹی کا بندہ ہے وہ بہتر کھیل رہا ہے مگر یہ لوگ اسکی جڑوں میں بیٹھ گئے ہیں۔

 ان کا کہنا تھا کہ ʼنواز شریف صاحب بھگوڑے ہیں، انہیں معلوم ہی نہیں کہ وہ وہی کھیل کھیل رہے ہیں جو بین الاقوامی ایجنڈا ہے۔ انہوں نے کہا کہ ʼنوٹی فکیشن جاری ہونا چاہیے کہ نواز شریف کی پارٹی ملک دشمن پارٹی ہے اور اس پر پابندی لگائی جاتی ہے، یہ پڑوسی ملک سے پیسے لے کر ملک میں انتشار پیدا کرنا چاہتے ہیں۔ 

شیخ رشید کا کہنا تھا کہ ʼمریم نواز کو اگر باہر نہ بھیجنا ہوتا تو یہ ٹولہ کبھی اکٹھا نہیں ہوتا۔انہوں نے مسلم لیگ (ن) کے قائد کو مخاطب کرتے ہوئے کہا کہ ʼنواز شریف صاحب استنبول کے ہوٹل میں 11 بجکر 20 منٹ پر ہونے والی ملاقات سے میں واقف ہوں اور میں نے خود خاموشی اختیار کر رکھی ہے۔

 وفاقی وزیر اطلاعات و نشریات سینیٹر شبلی فراز نے کہا ہے کہ عوام اپوزیشن کے ذاتی مفادات کی سیاست کو جانتے ہیں، اپوزیشن کا پہلا شو فلاپ ہوگیا، ان کے پاس کوئی پروگرام نہیں۔

انھوں نے عوام کیلئے کچھ نہیں کیا، مریم نواز بتائیں انہوں نے کسی غریب سے آخری ملاقات کب کی؟سینیٹر شبلی فراز نے کہا کہ گزشتہ روز اپوزیشن کے جلسے میں اداروں کے خلاف گھٹیا زبان استعمال کی، ملکی تحفظ کے ضامن اداروں کے خلاف مہم جوئی کی اجازت نہیں دی جاسکتی، اداروں کے خلاف ہرزہ سرائی کو برداشت نہیں کیا جائیگا۔ 

اس موقع پر فواد چوہدری نے کہا کہ عمران خان نے کہاتھا احتساب کا عمل شروع ہوگا یہ اکٹھے ہو جائیں گے، 11 پارٹیاں 15 سے 18 ہزار لوگ بھی اکٹھے نہیں کر پائیں، مولانا فضل الرحمان نے تو خالی کرسیوں سے خطاب کیا، ان کو اپنی اصلیت نظر آگئی، ان کو مزید جلسوں پر نظر ثانی کرنی چاہیے، امید ہے آپ اپنے باقی جلسے موخر کردینگے۔ 

وفاقی وزیر نے کہا کہ مسلم لیگ والوں سے کہتا ہوں کہ خطرناک کھیل نہ کھیلے، نواز شریف خطرناک بیانیے پر کام کررہے ہیں ، یہ بیانیہ ناکام ہوگا، نواز شریف کاعمل ایسا ہے جیسے ناراض محبوبہ، انہیں سمجھ نہیں آرہی کہ کیسے بدلہ لیں، میں نوازشریف کو باہر بھیجنے کے حق میں نہیں تھا کیونکہ جب ایسے لوگ باہر جاتے ہیں تو وہ غیر ملکی ایجنڈے کا حصہ بن جاتے ہیں۔

پاکستان کے اداروں پر تنقید بھارت کا ایجنڈا ہے، نوازشریف کو لندن سے واپس لایا جائے گا۔

اہم خبریں سے مزید