ڈاکوؤں کی فائرنگ، قوال شیر میاں داد بیٹے سمیت زخمی

23 اکتوبر ، 2020

معروف قوال شیر میاں داد فیصل آباد میں ڈاکوؤں کی فائرنگ سے بیٹے سمیت زخمی ہو گئے۔

شیر میاں داد شدید زخمی حالت میں فیصل آباد کے سول اسپتال میں زیرِ علاج ہیں۔

گزشتہ رات شیر میاں داد فیصل آباد میں قوالی کا پروگرام کرنے کے بعد واپس نکلے تو گٹ والا کے قریب موٹر سائیکل سوار ڈاکوؤں نے ان سے رقم چھیننے کے دوران ان پر فائرنگ کر دی۔

پولیس ذرائع کے مطابق معروف قوال شیر میاں داد گزشتہ رات گٹ والا کے علاقے میں ایک دربار پر قوالی کے پروگرام میں شرکت کے بعد واپس پاک پتن جانے کے لیے روانہ ہوئے تھے۔

گٹ والا کے قریب ہی ایک جگہ شیر میاُں گاڑی سے اترے تو 2 موٹر سائیکل سوار ڈاکوؤں نے اسلحے کے زور پر قوالی کے دوران اکٹھی ہونے والی رقم لوٹنے کی کوشش کی۔

اس دوران ڈاکوؤں نے فائرنگ کر دی جس سے شیر میاں داد سینے میں جبکہ ان کا بیٹا ہاتھ میں گولی لگنے سے زخمی ہو گئے۔

واردات کے بعد ڈاکو موقع سے فرار ہو گئے، شدید زخمی شیر میاں داد اور ان کے بیٹے کو گاڑی کے ڈرائیور نے سول اسپتال منتقل کیا جہاں شیر میاں داد کے جسم سے گولی نکالنے کے لیے ان کا آپریشن کیا گیا۔

دوسری جانب معروف قوال شیر میاں داد کے صاحبزادے عبید شیر میاں داد نے ’جیو نیوز‘ سے گفتگو کرتے ہوئے بتایا کہ والد صاحب کی طبیعت اب قدرے بہتر ہے۔

یہ بھی پڑھیے

انہوں نے بتایا کہ فیصل آباد کے نواحی گاؤں میں تقریب سے واپسی پر ڈاکوؤں نے ہمارا گھیراؤ کیا، والد صاحب ڈاکوؤں کی فائرنگ سے زخمی ہو گئے۔

عبید شیر میاں داد کے مطابق ڈاکٹروں نے کامیاب آپریشن کے بعد والد صاحب کی پسلی سے گولی نکال لی ہے جس کے بعد ڈاکٹروں کا کہنا ہے کہ والد صاحب کی حالت اب خطرے سے باہر ہے۔

انہوں نے یہ بھی بتایا کہ میں نے والد صاحب کو بچانے کی کوشش کی تو انہوں نے میرے دائیں ہاتھ پر بھی گولی مار دی جس سے میں بھی زخمی ہو گیا۔

تازہ ترین