رابی پیرزادہ طیب اردوان کی لمبی عُمر کیلئے دُعاگو

21 نومبر ، 2020

گزشتہ سال شوبز انڈسٹری سے کنارہ کشی اختیار کرنے والی رابی پیرزادہ نے تُرک صدر رجب طیب اردوان کی لمبی عُمر کے لیے دُعائیہ پیغام جاری کیا ہے۔

تُرک صدر رجب طیب اردوان کو اپنا پسندیدہ مسلمان لیڈر قرار دینے والی رابی پیرزادہ نے سماجی رابطے کی ویب سائٹ ٹوئٹر پر طیب اردوان کا ایک ٹوئٹ شیئر کیا ہے جس میں تُرک صدر نے تُرکی میں ہونے والے ’موسیقی ایکسپو میلہ‘ کی ویڈیو شیئر کی ہے۔

رجب طیب اردوان کی جا نب سے شیئر کی گئی ویڈیو میں وہ موسیقی ایکسپو میلے میں موجود سامعین سے خطاب کرتے دکھائی دے رہے ہیں۔

رابی پیرزادہ نے تُرک صدر کا ٹوئٹ شیئر کرتے ہوئے لکھا کہ ’میری دُعا ہے، اللّہ تعالیٰ آپ کو لمبی عُمر عطا کرے۔‘

اُنہوں نے طیب اردوان سے مخاطب ہوتے ہوئے لکھا کہ ’سر میں جب بھی آپ کی پوسٹ دیکھتی ہوں تو میں آپ کی لمبی زندگی اور خوشی کی دُعا کرتی ہوں۔‘

آخر میں رابی پیرزادہ نے تُرک صدر کو پورے پاکستان کی طرف سے محبت، عزت اور سلام بھی پیش کیا۔

اس سے قبل رابی پیرزادہ نے اپنے ایک ٹوئٹر پیغام کے ذریعے تُرک صدر رجب طیب اردوان کو اپنا پسندیدہ مسلمان لیڈر قرار دیا تھا۔

واضح رہے کہ گزشتہ دنوں رابی پیرزادہ نے ترک صدر طیب اردوان کو خراج تحسین پیش کرتے ہوئے اُن کی پینٹنگ بنائی تھی اور کہا تھا کہ رجب طیب اردوان عالمِ اسلام کے عظیم رہنماؤں میں سے ایک ہیں۔

رابی پیرزادہ نے کہا تھا کہ اُنہوں نے ہمیشہ اُمت مسلمہ کو متحد رکھنے کے لیے کوششیں کی ہیں اور دُنیا بھر میں مسلمانوں پر ہونے والے ظلم کے خلاف آواز اُٹھائی ہے۔

ٓاُنہوں نے تُرک صدر کے لیے خواہش ظاہر کرتے ہوئے کہا تھا کہ اُن کی خواہش ہے کہ وہ یہ پینٹنگ رجب طیب اردوان کو تحفے میں دیں۔

تازہ ترین