وزیراعلیٰ سندھ کو توہینِ عدالت کا نوٹس بھیجنا باعثِ تشویش ہے: تاج حیدر

26 نومبر ، 2020

پاکستان پیپلز پارٹی کے سینئر رہنما و سابق سینیٹر تاج حیدر کا کہنا ہے کہ وزیراعلیٰ سندھ سید مراد علی شاہ گزشتہ 12 دن سے قرنطینہ میں ہیں، انہیں توہینِ عدالت کا نوٹس بھیجنا باعثِ تشویش ہے۔

پی پی پی کے سینئر رہنما و سابق سینیٹر تاج حیدر نے سید مراد علی شاہ کو توہین عدالت کے بھیجے گئے نوٹس پر اپنا ردعمل دیتے ہوئے کہا کہ اس طرح کے توہین عدالت کے نوٹس سے تاثر پیدا ہوتا ہے کہ عدالتیں اور ان کی انا انسانیت سے دور ہیں۔

تاج حیدر نے کہا کہ قابلِ احترام عدالتیں جو نظیر قائم کر رہی ہیں، ان پر منصفانہ انسانی معاشروں میں عمل نہیں کیا جائے گا۔

اپنے بیان میں تاج حیدر نے اپیل کرتے ہوئے کہا کہ اعلیٰ عدالت سے اپیل ہے کہ وہ اپنے جاری کردہ توہینِ عدالت کے نوٹس پر نظرِ ثانی کرے۔

تاج حیدر کا مزید کہنا تھا کہ کورونا وائرس سے متاثر وزیر اعلیٰ سندھ کا حق ہے کہ وہ اپنی سرکاری ذمہ داریاں شروع کرنے سے پہلے روبہ صحت ہو جائیں۔

واضح رہے کہ ریلوےخسارہ ازخود نوٹس کیس کی سماعت کے دوران سپریم کورٹ نے عدالتی احکامات پر عملدرآمد نہ کرنے پر وزیر اعلیٰ سندھ سید مراد علی شاہ کو توہین عدالت کا نوٹس جاری کردیا ہے۔

عدالتی فیصلے کے مطابق کیس کی سماعت 2 ہفتوں کے لیے ملتوی کردی گئی ہے اور اس دوران وزیر اعلیٰ سندھ سید مراد علی شاہ 2 ہفتوں میں توہین عدالت نوٹس کا جواب جمع کروائیں گے۔

تازہ ترین