فرمان الہی
نماز کے اوقات
لاہور(نمائندہ جنگ) نائب صدرمسلم لیگ ن مریم نوازنے لاہورکادورہ کیا، رہنماؤں اورکارکنوں نےجگہ جگہ کیمپ لگا اور نعرے بازی کی۔
مریم نواز نے مختلف جگہوں پرخطاب میں کہاجعلی حکومت کے چند دن باقی ہیں، لاہورجلسے میں آریا پار ہوگا۔ انہوں نے مزیدکہاسلیکٹڈ حکومت کوگھربھیجنے کی ذمہ داری لاہورکے کندھوں پر آ گئی ہے۔
تفصیلات کے مطابق مسلم لیگ (ن) کی نائب صدر مریم نواز نے لیگی کارکنوں اور عوام کو 13دسمبر کو مینار پاکستان پر منعقدہ پی ڈی ایم کے جلسے میں شرکت کی دعوت دینے کیلئے لاہور شہر کا طوفانی دورہ کیا جس میں پارٹی رہنما اور کارکنان کی بڑی تعداد ان کے ہمراہ تھی ۔
مریم نوازدوپہر کے وقت جاتی امراء سے روانہ ہوئیں تو کارکنوں نے ان کی گاڑی پر پھولوں کی پتیاں نچھاور کیں اور حق میں نعرے لگائے ۔
مریم نواز کے استقبال کیلئے پارٹی کے اراکین اسمبلی اور رہنمائوں کی جانب سے مختلف مقاما ت پر استقبالیہ کیمپ لگائے گئے جہاں پر کارکنوں نے قافلے کے شرکاء پر پھولوں کی پتیاں نچھاور کیں اور قیاد ت کے حق میں نعرے لگائے ۔
مریم نواز کی ریلی قائداعظم انٹر چینج سے شروع ہو ئی جو داروغہ والا، شالیمار چوک، کپ سٹور، بادامی باغ سے ہوتی شاہدرہ ٹائون پہنچی ۔ مریم نواز نے مختلف مقامات پر اجتماعات سے خطاب کیا اور شرکاء کو تیرہ دسمبر کو مینار پاکستان کے جلسے میں شرکت کی دعوت دی ۔
مریم نواز نے داروغہ والا میں خطاب کرتے ہوئے کہا کہ جب لاہور بولتا ہے تو پورا پاکستان بولتا ہے ،جعلی حکومت کے دن گنے جا چکے ہیں او ر جعلی وزیر اعظم کے چند دن رہ باقی رہ گئے ہیں، اسے گھر بھیجنے کی حتمی ذمہ داری لاہور کے کندھوں پر آ گئی ہے ،یہاں آکر دیکھ لو کیا لوگوں کو کرسیوں کی ضرورت ہے۔
میں نواز شریف ، شہباز شریف اور اپنی طرف سے لاہوریوں کو تیرہ دسمبر کے جلسے میں شرکت کی دعوت دینے کیلئے خود آئی ہوں ۔ اس موقع پر خواجہ سعد رفیق اور خرم روحیل اصغر نے بھی خطاب کیا جبکہ پرویز رشید، مریم اورنگزیب اور دیگر رہنما بھی موجود تھے ۔
مریم نواز نے کہا کہ لاہور کے عوام نے تو آج سے ہی جلسے کے آغاز کر دیا ہے ، جو جعلی وزیر اعظم بیٹھا ہے میں نے اس کا نام تابعدار خان رکھ دیا ہے ، تم لاہور کا جلسہ روکو گے تو بھی جلسہ نہیں رکے گا ، تم کہتے ہو کرسیاں نہیں دوں گا، ٹینٹ نہیں دوں گا ، کیا داروغہ والا کے اجتماع میں کوئی کرسی نظر آرہی ہے ، کیا ان لوگوں کو کرسیوں کی ضرورت ہے ۔
انہوں نے کہا کہ لاہور سےمیری بہت سی امیدیں ہیں ، لاہور نے پاکستان کو نواز شریف جیسا بیٹا دیا ہے ، پی ڈی ایم کی قیادت نے آخری جلسہ لاہور میں اس لئے رکھا ہے کیونکہ13دسمبر کو آر یا پار ہوگا۔
انہوں نے کہا کیاآپ اپنی بیٹی کے ساتھ باہر نکلو گے ، مہنگائی ،بیروزگاری ، لا قانونیت کو ہمیشہ کے لئے ختم کرنے کے لئے باہر نکلو گے۔ کپ سٹو رجی ٹی روڈ پر خطاب کرتے ہوئے مریم نواز نے کہا کہ مجھے پتہ ہے یہ حلقہ حمزہ شہباز کا ہے۔
آج بہت افسوس سے کہنا پڑتا ہے لاہور کا بیٹا جس نے حلقہ این اے 124کی دل و جان سے خدمت کی آج وہ کوٹ لکھپت جیل کی سلاخوں کے پیچھے ہے ،پتہ ہے حمزہ کیوں جیل کے سلاخوں کے پیچھے ہے ۔
