فرمان الہی
نماز کے اوقات
پاکستان پیپلز پارٹی (پی پی پی) کے چیئرمین بلاول بھٹو زرداری کہتے ہیں کہ حکومتی وزراء پی ڈی ایم کے خلاف سازش کر رہے ہیں لیکن پی ڈی ایم متحد ہے، ہم ایک ہیں، پی ڈی ایم کی جیت پیپلز پارٹی کی جیت ہے۔
ٹھٹھہ میں میڈیا سے گفتگو کرتے ہوئے پاکستان پیپلز پارٹی (پی پی پی) کے چیئرمین بلاول بھٹو زرداری نے ایک بار پھر وزیرِ اعظم عمران خان کو تنقید کا نشانہ بنایا۔
انہوں نے کہا کہ وزیرِاعظم عمران خان اب بھی کہتے ہیں کہ وہ ٹریننگ پر ہیں، 3 سال ہونے کو ہیں، اب بھی یہ کہیں تو ہم کیا کریں؟ ان کے پاس مسائل کا حل نہیں تو انہیں استعفیٰ دینا چاہیئے۔
بلاول بھٹو زرداری نے کہا کہ پاکستان ڈیموکریکٹ موومنٹ کی تحریک مستحکم ہے، عوام کے تعاون سے سلیکٹڈ حکومت کو ہٹا کر عوامی حکومت لائیں گے۔
انہوں نے کہا کہ عمران خان کے خالی کرسیوں سے خطاب کو انقلاب کی طرح پیش کیا جاتا تھا، عوام پی ڈی ایم کا ساتھ دیں، کٹھ پتلی کو مل کر ہٹائیں گے۔
چیئرمین پیپلز پارٹی نے مطالبہ کیا کہ وفاق نیشنل ایکشن پلان پر عمل کرے، جس صوبے سے گیس کی پیداوار زیادہ ہے اسے حق نہیں مل رہا۔
انہوں نے کہا کہ ٹھٹھہ کے عوام تاریخی بے روزگاری اور مہنگائی کا مقابلہ کر رہے ہیں، ناجائز اور نااہل وزیرِاعظم کی وجہ سے ٹھٹھہ کے عوام کو تکلیف دہ حالات سے گزرنا پڑ رہا ہے۔
بلاول بھٹو زرداری کا کہنا ہے کہ پاکستان کی معیشت افغانستان اور بنگلا دیش سے بھی پیچھے چلی گئی ہے، پاکستان پیپلز پارٹی نے عوام کی طاقت پر بھروسہ کیا ہے۔
ان کا کہنا ہے کہ ٹھٹھہ کے عوام کو پی ڈی ایم کا ساتھ دینے کی دعوت دیتے ہیں، پی ڈی ایم ٹھٹھہ کے عوام کے مسائل حل کرے گی، کٹھ پتلی راج کے ذریعے سندھ کے عوام کے حقوق پر ڈاکہ ڈالا جارہا ہے۔
چیئرمین پی پی پی نے کہا کہ ہمارا ریکارڈ ہے کہ ہم نے غیر جمہوری طاقتوں کا ڈٹ کر مقابلہ کیا ہے، عوام کے ساتھ مل کر کٹھ پتلی حکومت کو گھر بھجوا دیں گے۔
اس سے قبل بلاول بھٹو زرداری نے ایک بیان میں بلوچستان میں کان کنوں پر دہشت گردی کی مذمت کرتے ہوئے کہا تھا کہ حکومت پی ڈی ایم پر شور مچانے کے بجائے اپنے کام پر توجہ دیتی تو ایسے واقعات نہیں ہوتے۔
انہوں نے یہ بھی کہا کہ وفاق نیشنل ایکشن پلان کو بھلا چکا ہے، دہشت گردوں کو چھوڑا جا رہا ہے۔
