پاکستان 378 پر آؤٹ، جنوبی افریقا کیخلاف 158 رنز کی برتری حاصل

28 جنوری ، 2021

جنوبی افریقا نے پاکستان کے خلاف اپنی دوسری اننگ میں چائے کے وقفے تک 84 رنز بنا لیے ہیں جبکہ اس کا ایک کھلاڑی آؤٹ ہوا ہے، اسے پاکستان کی برتری ختم کرنے کیلئے مزید 74 رنز درکار ہیں۔

جنوبی افریقا کی گرنے والی پہلی وکٹ یاسر شاہ کے حصے میں آئی جب ایلگر 29 رنز بنا کر رضوان کے ہاتھوں کیچ ہوئے۔

اس سے قبل پاکستان ٹیم کراچی ٹیسٹ میں جنوبی افریقا کے خلاف 158رنز کی سبقت حاصل کرنے کے بعد اپنی پہلی اننگ میں 378 رنز بنا کر آؤٹ ہوگئی۔

نیشنل اسٹیڈیم کراچی میں تیسرے دن کے کھیل کا آغاز ہوا تو 323 کے مجموعی اسکور پر حسن علی 21 رنز بناکر آؤٹ ہو گئے۔

حسن علی کو آؤٹ کرکے ربادا نے ٹیسٹ کرکٹ میں اپنی 200 وکٹوں کا سنگ میل عبور کیا۔

پاکستان کی جانب سے دسویں نمبر پر بیٹنگ کے لیے آنے والے لیگ اسپنر یاسر شاہ نے جارحانہ انداز اپناتے ہوئے وکٹ پر موجود نعمان علی کا ساتھ دیا اور تیز رفتاری کے ساتھ اسکور کو آگے بڑھایا۔

پاکستان کے آخری آؤٹ ہونے والے کھلاڑی نعمان علی تھے، انہیں 24 رنز پر مہاراجہ نے ایل بی ڈبلیو کیا۔

یاسر شاہ نے 4 چوکوں کی مدد سے 37 بالز پر ناٹ آؤٹ 38 رنز بنائے۔

پاکستان کی اننگ کی خاص بات فواد عالم کے 109 رنز تھے، فہیم اشرف نے 64 اور اظہر علی نے 51 رنز بنائے۔

اس سے قبل نیشنل اسٹیڈیم میں پاکستان کی پہلی اننگز کا آغاز تو تباہ کن رہا اور 27رنز پر 4 کھلاڑی آؤٹ ہوگئے۔