فرمان الہی
نماز کے اوقات
کراچی (اسٹاف رپورٹر/ٹی وی رپورٹ) پیپلز پارٹی کے شریک چیئرمین آصف علی زرداری کی بیٹی بختاور بھٹو زرداری، محمود چوہدری کے ساتھ رشتہ ازدواج میں منسلک ہوگئیں۔سابق صدر آصف علی زرداری نے بیٹی کو رخصت کیا ۔ نکاح کی تقریب بلاول ہائوس میں ہوئی۔نکاح کی تقریب میں آصف علی زرداری،بلاول بھٹوزرداری،ضم بھٹو،آصفہ بھٹو ،چوہدری یونس سمیت دونوں خاندانوں کی قریبی شخصیات نے شرکت کی۔بلاول بھٹو اور آصفہ بھٹو زرداری نے مہمانوں کا استقبال کیا۔دولہا محمود چوہدری اور دلہن بختاور بھٹو نے خوبصورت لباس زیب تن کیے تھے۔بلاول ہاؤس میں شادیانے بجتے رہے۔بختاور بھٹو کا نکاح ٹھٹھہ سے تعلق رکھنے والی روحانی اور دینی شخصیت الحاج غلام محمد سوہو نے پڑھایا۔ اس موقع پر بلاول ہاؤس کی سیکیورٹی کے سخت انتظامات کیے گئے تھے۔ مہمانوں کی تواضع بریانی، چکن تکہ، ملائی بوٹی، دھاگہ کباب، کٹا کٹ اور دیگر کھانوں سے کی گئی۔ سابق وزیراعظم بے نظیر بھٹو اور سابق صدر آصف علی زرداری کی صاحبزادی بختاور بھٹو زرداری کا ولیمہ 30 جنوری کو ہوگا۔ذرائع کے مطابق بختاورکی شادی سے متعلق چند دن بعداسلام آباد، لاہور اور لاڑکانہ میں بڑی تقاریب ہوں گی، اسلام آبادکی تقریب میں سیاسی جماعتوں کے قائدین، سرکاری افسران کومدعوکیاجائےگا۔ذرائع کے مطابق لاڑکانہ میں ہونےوالی تقریب میں بھٹو اور زرداری خاندان سمیت دیگر کو مدعو کیا جائے گا، جبکہ لاہورکی تقریب میں سیاسی شخصیات،پارٹی قائدین اور دیگر کو مدعوکیاجائے گا۔
