آپ آف لائن ہیں
جمعرات9؍ رمضان المبارک 1442ھ22؍اپریل 2021ء
  • بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

چوری کی گاڑیاں منتقل کرنے والا ایڈووکیٹ 9 ویں بار گرفتار

کراچی کی اینٹی وہیکل لفٹنگ سیل پولیس نے ایک کارروائی کے دوران ایک ملزم کو نویں مرتبہ گرفتار کر لیا ہے جس نے جیل میں قید کے دوران وکالت کا امتحان پاس کیا اور اب وکیل کے بھیس میں چینی اور چوری کی گئی گاڑیاں کراچی سے اندرون سندھ اور بلوچستان لے جاتا رہا ہے۔

کراچی پولیس کے سی آئی اے کے شعبہ اینٹی وہیکل لفٹنگ سیل کے ایس ایس پی عارف اسلم راؤ کے مطابق اے وی ایل سی گلشن ڈویژن نے کارروائی کے دوران ملزم ایوب ملک موہانا ولد ابراھیم کو گرفتار کرکے عزیز بھٹی تھانے کی حدود سے چوری کی گئی کار نمبر اے کے ٹی 044 برآمد کرلی۔ 

پولیس کے مطابق ملزم سال 2009 سے کراچی میں کاروں کی چوری میں ملوث ہے اور اس سے قبل 8 مرتبہ اینٹی وہیکل لفٹنگ سیل پولیس کے ہاتھوں گرفتار ہوچکا ہے۔ 

ترجمان اے بی ایل سی کے مطابق جیل میں قید کے دوران ملزم نے ایل ایل بی پاس کیا، ملزم وکیل کو یونیفارم میں چوری شدہ گاڑی لے جاتے ہوئے نویں بار گرفتار کر کے چوری شدہ کرولا کار برآمد کرلی۔

وکیل کی یونیفارم وارداتوں کے لیے استعمال کرنے کے بارے میں ملزم کا کہنا ہے کہ وکیل کی یونیفارم پہن کر گاڑی لے جا تے ہوئے ٹول ٹیکس ادا کرنے کے لیے رکنا پڑتا ہے اور نہ ہی چیکنگ کے دوران پولیس روکتی ہے۔ ملزم کے بیان کے مطابق وکالت کے دوران بھی خرچے پورے کر نے کے لیے گاڑیوں کی چوری کا کام کرتا رہا۔ 

پولیس کے مطابق ملزم کسی بھی مخصوص چابی سے کوئی بھی گاڑی کھولنے کا ماہر ہے، ملزم عادی جرائم پیشہ ہے جو کہ چوری کی کاریں جھٹ پٹ بلوچستان میں حاجی نام کے خریدار کو فروخت کرتا ہے۔ 

ملزم کراچی پولیس کو متعدد وارداتوں میں انتہائی مطلوب تھا، ایس ایس پی عارف اسلم راؤ کے مطابق گرفتار ملزم اپنے جرائم سے وکالت کے پیشے کو بدنام کررہا تھا، ملزم سے مزید تفتیش کی جارہی ہے۔

قومی خبریں سے مزید