تیرے خیال نے پہنا شفق کا پیراہن...

28 مارچ ، 2021

تحریر: عالیہ کاشف عظیمی

ماڈل: جیا ضیا

ملبوسات: مے سون (Maysoon) کلیکشن

آرایش: ماہ روز بیوٹی پارلر

عکّاسی: ایم کاشف

لے آؤٹ: نوید رشید

ساغر صدیقی کا شعر ہے؎’’مُسکراؤ بہار کے دِن ہیں …گُل کھلاؤ بہار کے دِن ہیں‘‘، تو بلاشبہ بہار کے اس موسم میں جب چارسُو رنگینی و دِل کشی ڈیرے سےڈال لیتی ہے، بے وجہ بھی ہنسنے ،ہنسانے، بننے سنورنے کو مَن مچلے جاتا ہے اور سونے پر سہاگا بہار کے ساتھ شادیوں کا سیزن بھی عروج پر ہے۔ آئے روز ہی کسی نہ کسی تقریب کا سندیس آجاتا ہے ،تو ہم نے بھی ان دو حسین رُتوں کی عین مناسبت سے آج اپنی بزم کچھ رنگا رنگ تقریباتی پہناووں ہی سے مزیّن کر ڈالی ہے۔

ذرا دیکھے، فون رنگ بنارسی جارجٹ غرارے کے ساتھ شیفون جارجٹ فیبرک میں کام دار ائیر لائن فراک کی دِل کشی و زیبائی کیا غضب ڈھا رہی ہے۔ ساتھ کرن سے آراستہ دوپٹّے کی ہم آمیزی بھی اچھی ہے۔ براؤن رنگ بنارسی ٹراؤزر کے ساتھ قدرے لمبی قمیص ہے، جس کے گلے پر انتہائی حسین دبکے، سلمے کا کام ہے، تو کہیں کہیں ستارے ٹانکے گئے ہیں،جب کہ کنٹراسٹ میں طلائی رنگ آرگنزا کا دوپٹا خوش گوار تاثر دے رہا ہے۔

پھر شوخ جامنی رنگ جامہ وار غرارے، قمیص کا انتخاب بھی اچھا ہے کہ قمیص پر بَھرا بَھرا کام بہت بھلا معلوم ہو رہا ہے۔ اِسی طرح ایک جانب ڈارک اسکن رنگ جامہ وار غرارے کے ساتھ کام دار ائیر لائن فراک اور اِسی رنگ میں پلین دوپٹا کِھل رہا ہے،تو دوسری جانب سیاہ رنگ لباس بھی خُوب بہار دکھا رہا ہے کہ پلین ٹراؤزر کے ساتھ تھریڈ ورک سے آراستہ قمیص پر گل بُوٹوں کے جال نے لباس کی شان کچھ اور بھی بڑھا دی ہے۔

تازہ ترین