فرمان الہی
نماز کے اوقات
دھیرکوٹ (نمائندہ جنگ / این این آئی)مسلم لیگ (ن) کی نائب صدر مریم نواز نے کہا ہے کہ مائنس کی باتیں کرنے والے دیکھ لیں نوازشریف آزاد کشمیر میں پلس پلس ہورہے ہیں،نواز شریف کے ساتھ اے ٹی ایم نہیں عوام کی طاقت ہے ، عمران خان تبدیلی نہیں تباہی لایا۔
سلیکٹڈ کو ہر جگہ پر مسترد کیا گیا، کہتے تھے کہ سیم پیج پر ہیں لیکن اب یہ شیم پیج بن گیا، ،25جولائی معرکے کا دن ہوگا آپ نے صرف ووٹ کو عزت نہیں دلوانی اپنے ووٹ پر پہرہ بھی دینا ہے، امیدوار کی جیت تک گھر نہیں جانا،اگر عمران خان باغ میں جلسہ نہ کرتے تو ان کا بھرم رہ جاتا۔
اتوار کودھیر کوٹ میں جلسے سے خطاب کرتے ہوئے مریم نواز نے کہا کہ ہمارے رہنما کہتے ہیں کہ ہم نے بڑے جلسے دیکھے لیکن پہلی بار پانچ منزلہ جلسہ دیکھا ہے، عمران خان غربیوں کے پاس نہیں صرف پیسوں والوں کے پاس جاتے ہیں، عوام سے ووٹ مانگنے والا سلیکٹڈ عام کے ٹیکس کا پیسہ ہیلی کاپٹر میں پھوک کر آیا تاہم کروڑوں روپے سرکاری پیسہ خرچ کرکے بھی انہیں عوام نے مسترد کردیا۔
ایسے جلسے کو جلسی بھی نہیں کہا جاسکتا، نواز شریف کے ساتھ اے ٹی ایم نہیں ہیں بلکہ عوام کی طاقت ہے اور اسی وجہ سے سلیکٹڈ کو ہر جگہ سے عوام نے ریجیکٹ کیا ،میں نواز شریف کو مبارکباد دیتی ہوں کہ وہ یہ الیکشن جیت چکے ہیں۔انہوں نے کہاکہ میاں صاحب بھلے آزاد کشمیرمیں موجود نہیں مگر وہ ہر جلسہ دیکھتے ضرور ہیں۔
انہوں نے کہا کہ دھیر کوٹ کا مقابلہ ان سے ہے جن کا تعلق مشرف سے رہا ، ان کا تعلق ہمیشہ اقتدار سے رہا ہے عوام سے نہیں رہا۔ ایک بار پھر عمران پر تنقید کرتے ہوئے مریم نواز نے کہاکہ وہ کہہ رہا تھا کہ میں پاکستان میں تبدیلی لایاہوں اب آزاد کشمیر میں بھی لائوں گا، اگر تم نے آزاد کشمیر کے ووٹ پر نظر رکھی تو یاد رکھو آزاد کشمیر والے تمہار ا بہت برا حال کرنے والے ہیں۔
عمران خان یہاں اپنا کٹھ پتلی وزیرا عظم لا کر آزاد کشمیر کی شناخت چھین کر پاکستان کا صوبہ بنانا چاہتا ہے،عمران خان یہ فیصلہ بہت پہلے کرکے آزاد کشمیر میں آیا ہے۔
