کورونا کیسز: آرٹس کونسل کا تقافتی و دیگر سرگرمیاں غیر معینہ مدت تک بند کرنے کا فیصلہ

صدر آرٹس کونسل آف پاکستان کراچی محمد احمد شاہ نے اپنے ایک بیان میں کہا ہے کہ کورونا وبا ان دنوں شدت اختیار کر رہی ہے، صورتحال تشویشناک ہونے کے باعث آرٹس کونسل نے اپنی سرگرمیاں بند کرنے کا فیصلہ کیا ہے۔

انہوں نے کہا کہ حالات ساز گار ہونے تک مختلف ثقافتی سرگرمیاں، تقریبات اور آرٹس کونسل کی تمام اکیڈمیز کی کلاسز بند کی جارہی ہیں، جن میں میوزک اکیڈمی، ڈانس اکیڈمی، تھیٹر اکیڈمی اور آرٹس کونسل انسیٹیوٹ آف آرٹس اینڈ کرافٹس شامل ہیں۔

صدر آرٹس کونسل محمد احمد شاہ نے مزید کہا کہ کلاسز کھولنے کا دوبارہ اعلان حکومت سندھ کے اسکول کھولنے کے فیصلے سے مشروط ہے۔

ڈیلٹا ویرینٹ بڑا خطرناک، وزیراعلیٰ سندھ نے 8 اگست تک لاک ڈاؤن لگادیا

وزیراعلیٰ سندھ سید مراد علی شاہ نے صوبے بھر میں 8 اگست 2021ء تک جزوی لاک ڈاؤن لگانے کا اعلان کردیا اور اپیل کی کہ لاک ڈاون کو کامیاب کرنے میں ہماری مدد کریں۔

انہوں نے کہا کہ کورونا کے کیسز کی شرح میں اضافہ ہورہا ہے اور یہی وجہ ہے کہ کلاسز اور ثقافتی سرگرمیاں بند کرنے کا فیصلہ کیا گیا ہے کیونکہ آرٹس کونسل نے ہمیشہ شہریوں کی صحت کو ترجیح دی ہے۔

محمد احمد شاہ نے مزید کہا کہ اس ضمن میں آرٹس کونسل کراچی میں گزشتہ 5 ماہ سے قائم ویکسینیشن سینٹر سے ممبران آرٹس کونسل سمیت ان کے اہلِ خانہ، ادیب، شاعر اور فنکار برادری کی بڑی تعداد کورونا سے بچاؤ کا ٹیکہ لگواچکے ہیں، آرٹس کونسل کراچی میں ویکسین لگانے کا یہ سلسلہ تاحال جاری ہے۔