فرمان الہی
نماز کے اوقات
پاکستان پیپلز پارٹی (پی پی پی) سندھ کے جنرل سیکریٹری وقار مہدی نے مطالبہ کیا ہے کہ الیکشن کمیشن کورنگی کنٹونمنٹ بورڈ کی حدود میں پی ٹی آئی رکنِ اسمبلی فہیم خان اور راجہ اظہر کی سرگرمیوں کا نوٹس لے۔
جاری کیئے گئے ایک بیان میں پاکستان پیپلز پارٹی (پی پی پی) سندھ کے جنرل سیکریٹری وقار مہدی نے کہا ہے کہ پی ٹی آئی کے ارکانِ اسمبلی کی پولنگ اسٹیشنز کے باہر موجودگی ضابطۂ اخلاق کی سنگین خلاف ورزی ہے۔
انہوں نے مزید کہا کہ الیکشن کمیشن انتخابی عمل پر پی ٹی آئی کے ارکانِ اسمبلی کے اثر انداز ہونے کا نوٹس لے۔
وقار مہدی کا یہ بھی کہنا ہے کہ پیپلز پارٹی کے شکایتی سیل نے پی ٹی آئی ارکانِ اسمبلی کے خلاف شکایت الیکشن کمیشن کو ارسال کر دی ہے۔
واضح رہے کہ کراچی میں حکمراں جماعت پاکستان تحریکِ انصاف (پی ٹی آئی) کے ایم این اے فہیم خان کورنگی کنٹونمنٹ کے وارڈ نمبر 3 بھٹائی کالونی پہنچ گئے جس پر پیپلز پارٹی کے امیدوار ناصر شیخ نے بھی احتجاج کیا۔
دوسری جانب ملک بھرمیں کنٹونمنٹ بورڈز کے انتخابات کے سلسلے میں ووٹنگ کا عمل جاری ہے، بڑی تعداد میں ووٹرز اپنے گھروں سے نکل کر ووٹ ڈالنے آ رہے ہیں۔
آج صبح 8 بجے شروع ہونے والا پولنگ کا عمل شام 5 بجے تک بغیر وقفے کے جاری رہے گا۔
