الیکشن کمشنر پنجاب اسرار خان کا مختلف پولنگ اسٹیشنز کا دورہ

الیکشن کمشنر پنجاب اسرار خان نے کنٹونمنٹ بورڈز کے انتخابات کے حوالے سے لاہور کے مختلف پولنگ اسٹیشنز کا دورہ کیا۔

اس موقع پر صوبائی الیکشن کمشنر اسرار خان نے پولنگ ایجنٹس سے بات بھی کی اور ان کے مسائل بھی جانے۔

لاہور، پشاور: پولنگ اسٹیشنز کے باہر سیاسی کارکنوں کے نعرے

کنونمنٹ بورڈ کے جاری انتخابات کے دوران لاہور اور پشاور میں پولنگ اسٹیشنوں کے باہر سیاسی جماعتوں کے کارکنوں نے ایک دوسرے کے خلاف نعرے لگائے ہیں جس سے صورتِ حال کشیدہ ہو گئی۔

دوسری جانب لاہور میں ہونے والے کنٹونمنٹ بورڈ کے انتخابات کی سی سی ٹی وی کیمروں سے مانیٹرنگ جاری ہے۔

انچارج کنٹرول روم کے مطابق شہر کے حساس پولنگ اسٹیشنز کی لائیو مانیٹرنگ جاری ہے۔

انہوں نے بتایا کہ لاہور میں 20 پولنگ اسٹیشن حساس ہیں، جنہیں لائیو مانیٹر کیا جارہا ہے۔

لاہور: امیدوار کا انتقال، پولنگ کا عمل ختم

الیکشن کمشنر کے مطابق لاہور میں والٹن کنٹونمنٹ بورڈ کے وارڈ نمبر 7 کی جنرل نشست کےآزاد امیدوار شوکت محمود انتقال کر گئے، جس کی وجہ سے اس وارڈ میں پولنگ کا عمل روک دیا گیا ہے۔

انچارج کنٹرول روم نے یہ بھی بتایا کہ تمام اداروں کی کنٹرول روم سے کوآرڈینیشن جاری ہے، لاہور میں پر امن طریقے سے پولنگ ہو رہی ہے۔

واضح رہے کہ ملک بھر میں کنٹونمنٹ بورڈز کے انتخابات کے سلسلے میں ووٹنگ کا عمل جاری ہے، بڑی تعداد میں ووٹرز اپنے گھروں سے نکل کر ووٹ ڈالنے آ رہے ہیں۔

آج صبح 8 بجے شروع ہونے والا پولنگ کا عمل شام 5 بجے تک بغیر وقفے کے جاری رہے گا۔