کراچی.......مشیر اطلاعات سندھ مولا بخش چانڈیو کہتے ہیں کہ چوہدری نثار سندھ آئیں انہیں خوش آمدید کہیں گے اور کڑوی گولی کے طور پر قبول کریں گے۔
کراچی پریس کلب کے انتخابات میں کامیاب ہونے والے امیدواروں کو مبارک باد دینے کے بعد میڈیا سے بات کرتے ہوئے مولا بخش چانڈیوکا کہنا تھا کہ سندھ میں داعش کا کوئی وجود نہیں، اس کی ضمانت میں خود دیتاہوں،داعش کے لوگ پنجاب سے پکڑے جارہے ہیں۔
انہوں نے کہا کہ وزیراعلیٰ سندھ سمیت تمام افراد کہہ رہے ہیں کہ کراچی میں دہشت گردی کے خاتمے تک آپریشن جاری رہنا چاہیے، پیپلز پارٹی رینجرز اختیارات کی مخالفت نہیں کر رہی، وفاق کو فیصلہ سنانے سے پہلے صوبے کو اعتماد میں لینا چاہیے تھا۔
مولا بخش چانڈیو نے مزید کہا کہ وفاقی وزیر چوہدری نثار کا لب و لہجہ درست نہیں، پھر بھی وہ وزیر داخلہ کی حیثیت سے ہمارے مسائل حل کرنے کراچی آئیں گے تو انہیں کڑوی گولی کے طور پر نگلنا ہوگا ۔
مشیر اطلاعات مولا بخش چانڈیو کا کہنا تھا کہ اپوزیشن جماعتیں رینجرز اختیارات کے معاملے پر اپنی سیاست چمکا رہے ہیں، اپوزیشن کا گرینڈ الائنس جمہوریت کو ختم کرنے کے لیے بن رہا ہے۔
فرمان الہی
نماز کے اوقات
