منیبہ مزاری کا بھی ڈاکٹر عبدالقدیر خان کے انتقال پر اظہارِ افسوس

10 اکتوبر ، 2021

معروف سماجی کارکن منیبہ مزاری نے بھی محسنِ پاکستان ڈاکٹر عبدالقدیر خان کے انتقال پر افسوس کا اظہار کیا ہے۔

منیبہ مزاری نے مائیکرو بلاگنگ ویب سائٹ ٹوئٹر پر ڈاکٹرعبدالقدیر خان کی ایک یادگار تصویر شیئر کرتے ہوئے اظہارِ افسوس کیا ہے۔

ٹوئٹر پر شیئر کی گئی تصویر پر ڈاکٹر عبدالقدیر خان کی تاریخِ پیدائش اور تاریخِ وفات درج ہے۔

انہوں نے ڈاکٹر عبدالقدیر خان کی تصویر شیئر کرتے ہوئے صرف ٹوٹے ہوئے دل والے ایک ایموجی کا استعمال کیا۔

واضح رہے کہ محسنِ پاکستان، ایٹمی سائنسدان ڈاکٹر عبد القدیر خان آج صبح رضائے الٰہی سے انتقال کر گئے۔

ذرائع نے بتایا ہے کہ طبیعت بہت زیادہ خراب ہونے کی وجہ سے ڈاکٹر عبدالقدیر خان کو صبح 6 بجے کے آر ایل اسپتال لایا گیا تھا۔

اسپتال ذرائع کے مطابق ڈاکٹر عبدالقدیر خان کا انتقال صبح 7 بج کر 4 منٹ پر ہوا، ان کی کچھ عرصے سے طبیعت ناساز تھی۔

اسپتال ذرائع نے بتایا ہے کہ ڈاکٹر عبدالقدیر خان کچھ عرصے قبل کورونا وائرس سے متاثر ہوئے تھے۔

ڈاکٹر عبدالقدیر خان 1936ء میں بھوپال میں پیدا ہوئے، وہ اہلِ خانہ کے ہمراہ 1947ء میں ہجرت کر کے پاکستان آئے۔

ڈاکٹر عبدالقدیر نے انجینئرنگ کی ڈگری 1967ء میں نیدر لینڈز کی ایک یونی ورسٹی سے حاصل کی، انہوں نے بیلجیئم کی ایک یونی ورسٹی سے میٹلرجیکل انجینئرنگ میں ڈاکٹریٹ کی ڈگری لی۔