سلیم مانڈوی والا کا فرخ حبیب کو الزامات ثابت کرنے کا چیلنج

12 اکتوبر ، 2021

پیپلز پارٹی کے سینیٹر اور سابق ڈپٹی چیئرمین سینیٹ سلیم مانڈوی والا کا کہنا ہے کہ میں فرخ حبیب کو چیلنج کرتا ہوں کہ وہ پیپلز پارٹی پر لگائے گئے الزامات ثابت کریں۔

وزیرِ مملکت برائے اطلاعات فرخ حبیب کے پیپلز پارٹی کے خلاف بیانات پر سینیٹر سلیم مانڈوی والا نے ردِعمل دیتے ہوئے کہا ہے کہ فرخ حبیب کے پیپلز پارٹی کے فنانشل دستاویز تک رسائی کے بیانات جھوٹ ہیں۔

سلیم مانڈوی والا نے کہا کہ جعلی اکاؤنٹس کیس الیکشن کمیشن میں زیرِ سماعت ہے، الیکشن کمیشن کے فیصلے سے قبل فرخ حبیب نے کیس کا فیصلہ کیسے سنا دیا؟ الیکشن کمیشن فرخ حبیب کے ان بیانات کا فوری نوٹس لے۔

انہوں نے کہا کہ فیصلے سے قبل فرخ حبیب نے پیپلز پارٹی پر 12 اکاؤنٹس چھپانے کا الزام لگایا، الیکشن کمیشن کے فیصلے سے قبل فرخ حبیب کے بیانات کیس پر اثر انداز ہونے کے مترادف ہیں۔

سلیم مانڈوی والا کا مزید کہنا تھا کہ پیپلز پارٹی نہیں بلکہ تحریکِ انصاف جعلی اکاؤنٹس کیس سے بھاگ رہی ہے۔

تازہ ترین