سابق وزیراعظم عمران خان کی اہلیہ بشریٰ بی بی کی دوست فرح گوگی کو فیصل آباد اکنامک زون میں 10 ایکڑ انڈسٹریل پلاٹ کی غیرقانونی الاٹمنٹ کے معاملے پر اینٹی کرپشن حکام نے 2 افراد کو گرفتار کرلیا۔
محکمہ اینٹی کرپشن کے حکام کا کہنا ہے کہ فیڈمک کے سابق سی ای او رانا یوسف کو اینٹی کرپشن نے گرفتار کرلیا، سیکریٹری اسپیشل اکنامک زون کمیٹی مقصود احمد کو بھی گرفتار کرلیا گیا۔
اینٹی کرپشن حکام کا کہنا ہے کہ ملزمان پر فرح گوگی اور ان کی والدہ کی کمپنی کو غیرقانونی طور پر انڈسٹریل پلاٹ دینے کا الزام ہے۔
حکام کا کہنا ہے کہ ملزمان نے فیصل آباد اسپیشل اکنامک زون میں قیمتی انڈسٹریل پلاٹ کوڑیوں کے بھاؤ الاٹ کیا، 60 کروڑ مالیت کا پلاٹ صرف 8 کروڑ 30 لاکھ روپےجعلی کمپنی بناکر الاٹ کروایا گیا۔
اینٹی کرپشن حکام کا کہنا ہے کہ انڈسٹریل پلاٹ لینے کے لیے کمپنی کی ویلیو 2 ارب روپے ہونی چاہیے تھی، فرح گوگی کے شوہر احسن جمیل گجر نے 2 ارب روپے کی جعلی گارنٹی دی۔
حکام کا کہنا ہے کہ اینٹی کرپشن فرح گوگی اور احسن جمیل گجر کے اثاثوں کی چھان بین بھی کر رہی ہے، گرفتار دونوں ملزمان کے خلاف اینٹی کرپشن فیصل آباد میں مقدمہ درج کیا گیا۔
حکام کا کہنا ہے کہ اینٹی کرپشن کی 3 رکنی جوائنٹ انویسٹی گیشن ٹیم کیس کی تحقیقات کر رہی ہے۔