کراچی میں انسداد دہشت گردی (اے ٹی سی) کی خصوصی عدالت میں ملزم پر ٹیکسٹائل ملز کے جنرل مینجر سمیت 2 افراد کے قتل کا جرم ثابت ہوگیا۔
اے ٹی سی کراچی نے کالعدم تنظیم کے دہشتگرد ہاشم کو 3 بار سزائے موت اور مقتولین کے ورثا کو فی کس 20 لاکھ روپے ہرجانے کا حکم سنا دیا۔
عدالت نے مجرم پر دہشت گردی اور دیگر جرائم میں 18 سال قید، 2 لاکھ 10 ہزار روپے جرمانہ بھی عائد کیا۔
اے ٹی سی کراچی نے مجرم کو غیر قانونی اسلحے کے جرم میں 7 سال قید اور 50 ہزار روپے جرمانہ کیا۔
پراسیکیوشن کے مطابق فروری 2015ء میں نارتھ ناظم آباد میں مجرم نے شہریوں پر فائرنگ کی تھی۔
مجرم کی فائرنگ سے کریم ہاشوانی اور محمد نواز جاں بحق ہوگئے تھے۔ ملزم نے 2 افراد کو قتل کرنے کے بعد پولیس پر بھی فائرنگ کی تھی۔
پراسیکیوشن کے مطابق مجرم ہاشم کے خلاف مقدمات نارتھ ناظم آباد تھانے میں درج کیے گئے تھے۔