ڈیلس(راجہ زاہد اختر خانزادہ نمائندہ جنگ) امریکی ریاست ٹیکساس کے شہر ڈیلس کی وفاقی جیل میں گزشتہ 20سال سے مقید اپنی بہن ڈاکٹر عافیہ صدیقی سے تیسری اور الوداعی ملاقات کے بعد ڈاکٹر فوزیہ نے ریاست ٹیکساس کے شہر پلانو کی مسجد میں منعقدہ پاکستانی امریکنزکے اجتماع میں شرکت کی اپنی بہن سے ملاقات کی روداد سناتے ہوئے ڈاکٹر فوزیہ صدیقی آبدیدہ ہوگئیں جبکہ کئی افراد کے بھی جذبات سے آنسو نکل آئےپاکستانی امریکی کمیونٹی اور دیگر اقوام کے مسلمانوں سے خطاب کرتے ہوئے ڈاکٹر فوزیہ صدیقی کا کہنا تھا کہ عافیہ جس تشدد اور قید و بند کی مشکلات سے گزری ہے اس میں اس کا زندہ رہنا معجزہ ہے، میں نے امریکی جیل میں آخرکار ظالم اور مظلوم کو ایک ہی چھت تلے دیکھا ،ڈاکٹر فوزیہ صدیقی نے امریکی مسلمانوں سے ڈاکٹر عافیہ کیلئے مالی قانونی اور اخلاقی مدد فراہم کر نے کی اپیل بھی کردی، انہوں نےکہا کہ امریکا کا ویزا دلوانے میں وزیر اعظم شہباز شریف نے بہت مدد کی۔