پاکستان پیپلز پارٹی کے مرکزی رہنما نیئر بخاری نے سینیٹر بہرامند تنگی کی قرار داد سے لاتعلقی کا اعلان کردیا۔
ایک بیان میں نیئر بخاری نے کہا کہ سینیٹر بہرا مند تنگی کی سینیٹ میں جمع کرائی گئی قرارداد سے پیپلزپارٹی کا کوئی تعلق نہیں۔
پی پی رہنما نے مزید کہا کہ سینیٹر بہرامند تنگی کا پارٹی سے کوئی تعلق نہیں ہے، ہم اُن کی بنیادی رکنیت ختم کرچکے ہیں، وہ پارٹی کا نام استعمال نہ کریں گے۔
پی پی کے سیکریٹری جنرل نے یہ بھی کہا کہ بہرامند تنگی کو پارٹی پالیسی سے انحراف پر اظہار وجوہ کا نوٹس دیا گیا تھا، وہ پارٹی کے سامنے وضاحت کرنے میں ناکام رہے تھے۔
انہوں نے کہا کہ پی پی چارسدہ کے صدر نے سینیٹر کی بنیادی پارٹی رکنیت منسوخ کردی تھی، وہ 11 مارچ کو سینیٹ سے ریٹائر ہورہے ہیں۔