نجم مظفر پوری
ایک ہیں اپنے پیٹو بھائی
کھاتے ہیں دن رات ملائی
ہر دم چرنا کام ہے ان کا
پیٹو یوں ہی نام ہے ان کا
ننھی سیما کو بہلا کر
لے لیتے ہیں بسکٹ آ کر
رو دیتی ہے بے بی روزی
چھینتے ہیں جب اس کی ٹافی
رنگ شرارت اک دن لائی
بیٹھے بیٹھے شامت آئی
کنڈی میں رکھی تھی مٹھائی
امی نے کمرے میں چھپائی
پیٹو بھائی نے جب دیکھا
منہ میں جھٹ پانی بھر آیا
سوچا دل میں مال ہے اچھا
ہاتھ لگے تو پھر کیا کہنا
برفی لڈو بالو شاہی
خوب مزے لے لے کر کھائی
شام کو جب امی نے سوچا
دیکھیں کنڈی میں ہے کیا
آ کر جب الماری دیکھی
پائی کنڈی بالکل خالی
چونک اٹھیں پھر غصہ آیا
پیٹو صاحب کو گرمایا
ہونے لگی جب خوب پٹائی
توبہ کی اور جان چھڑائی
پٹتے بھی ہیں کھاتے بھی ہیں
روتے بھی ہیں گاتے بھی ہیں