لگتا ہے انضی کے پیارے دل کو نظر لگ گئی، وسیم اکرم

September 28, 2021

قومی کرکٹ ٹیم کے سابق فاسٹ بولر وسیم اکرم کا سابق کپتان انضمام الحق کی ناساز طبیعت پر کہنا ہے کہ انہیں ایسا لگتا ہے کہ انضمام الحق کے پیارے دل کو کسی کی نظر لگ گئی۔

انہوں نے ٹوئٹر پر قومی زبان اردو میں انضمام الحق کیلئے ایک خوبصورت پیغام شیئر کیا، جس میں انہوں نے لکھا کہ ’پیارے انضی ، تمہارا دل ،اتنا پیارا دل، اسکو لگتا ہے نظر لگ گئی ۔‘

وسیم اکرم نے کہا کہ بہت فکر ہوئی کہ اتنے پیارے دل والے کو تکلیف ہوئی ، دعا ہے کہ تم ٹھیک ہو کر جلد اپنے پیارے دل سے ہم سب کو اسی طرح خوش کرو گے جیسا تم ہمیشہ کرتے ہو۔ ‘

سابق کرکٹر نے یہ بھی لکھا کہ پیارے دوست اپنا خوب خیال رکھو ۔ جلد ملتے ہیں ۔

بعد ازاں انہوں نے اردو سے ناآشنا اپنے مداحوں کیلئے یہی پیغام انگریزی میں بھی شیئر کیا۔

واضح رہے کہ قومی کرکٹ ٹیم کے سابق کپتان اور سابق چیف سلیکٹر انضمام الحق کو اسپتال سے ڈسچارج کر دیا گیا۔

سابق کرکٹر کے مینجر کا کہنا ہے کہ لیجنڈ انضمام الحق پہلے سے بہتر محسوس کر رہے ہیں، گزشتہ رات ان کی انجیو پلاسٹی کی گئی تھی۔