رکاوٹوں کے باوجود خدمت کا مشن جاری ہے، شہباز شریف

پنجاب کے وزیراعلیٰ محمد شہبازشریف کا کہنا ہے کہ حکومت نے رکاوٹوں کے باوجود عوام کی خدمت کا مشن جاری رکھا ہوا ہے، عوام کی تکلیفوں کو راحت میں بدلنے کیلئے عزم اور جانفشانی سےکام کر رہے ہیں۔

لاہور سے جاری بیان میں شہبازشریف نےکہاکہ متوازن ترقیاتی حکمتِ عملی کےتحت پسماندہ علاقوں کی ترقی پر خصوصی توجہ دی گئی ہے۔ گزشتہ سوا4برس کےدوران دیانت کےساتھ کی گئی محنت رنگ لا رہی ہے۔

ان کا کہنا تھا کہ ن لیگ کو اقتدار ملا تو ملک معاشی طور پر تباہ حال اور اندھیروں میں ڈوبا ہوا تھا، 18،18 گھنٹے کی لوڈ شیڈنگ نے زندگی اجیرن بنا رکھی تھی۔ بد امنی کی آگ ہر طرف پھیلی ہوئی تھی۔مسلم لیگ ن کی انتھک محنت کےباعث ملک سے اندھیرے دور ہوئے، قوم کو امن ملا اور تجارتی، معاشی اور سماجی سرگرمیوں میں اضافہ ہوا۔

ان کا مزید کہنا تھا کہ ن لیگ کےدور میں پُرامن، روشن اور معاشی طور پر مضبوط پاکستان ابھر کر سامنے آیا ہے۔