آریان خان کیس: دوران سماعت بھیڑ کم کرنے کا حکم

26 اکتوبر ، 2021

بالی ووڈ اسٹار شاہ رخ خان کے بیٹے آریان خان کی درخواستِ ضمانت پر ممبئی ہائی کورٹ میں سماعت کے دوران عدالت میں بھیڑ کم کرنے کا حکم نامہ جاری کردیا گیا ہے۔

بھارتی میڈیا کی رپورٹ کے مطابق ، عدالت نے حکم دیا ہے کہ آریان خان کی درخواستِ ضمانت پر ہائی کورٹ میں سماعت کے دوران عدالت میں لوگوں کی تعداد زیادہ نہ ہو۔

رپورٹ میں مزید بتایا گیا ہے کہ کمرۂ عدالت میں بھیڑ کم کرنے کے لیے عدالت نے صرف کیس نمبر 45 سے لےکر 55 تک کے متعلقہ لوگوں کو عدالت میں رہنے کی اجازت دی ہے۔

عدالت نے پولیس اہلکاروں سے اس بات کو یقینی بنانے کو کہا کہ آریان خان کے کیس کی سماعت کے دوران کمرۂ عدالت میں بھیڑ نہ ہو۔

یاد رہے کہ بالی ووڈ کنگ شاہ رخ خان کے بیٹے آریان خان کی درخواست ضمانت خصوصی عدالت کی جانب سے 20 اکتوبر کو مسترد کر دی گئی تھی ۔

مسلسل درخواستِ ضمانت مسترد ہونے کے بعد آریان خان کے وکلاءکی جانب سے ممبئی ہائیکورٹ میں درخواست دائر کی گئی جس کی سماعت آج ہوگی۔

خیال رہے کہ بھارت کے انسدادِ منشیات ادارے نارکوٹکس کنٹرول بیورو (این سی بی) کی جانب سے ممبئی کے ساحل پر 3 اکتوبر کو ایک کروز شپ پر پارٹی کے دوران چھاپہ مار کر شاہ رخ خان کے بیٹے آریان خان کو گرفتار کیا گیا تھا۔

تازہ ترین