فرمان الہی
نماز کے اوقات
وفاقی وزیر داخلہ شیخ رشید احمد کا کہنا ہے کہ 23 مارچ کو مارچ کا اعلان کرنے والوں کو ہوش کے ناخن لینے چاہیے، قانون ہاتھ میں لینے کی کسی کو اجازت نہیں دی جا سکتی۔
وزیراعلیٰ پنجاب عثمان بزدار سے وفاقی وزیر داخلہ شیخ رشید احمد نے ملاقات کی۔
اس موقع پر شیخ رشید نے کہا کہ اپوزیشن ٹولے کے ہاتھ سے وقت ریت کی طرح نکلتا جارہا ہے۔
وفاقی وزیر داخلہ شیخ رشید احمد نے کہا کہ پنجاب حکومت راولپنڈی کے عوام کے مسائل کو ترجیحی بنیادوں پر حل کر رہی ہے، امن و عامہ کی صورتحال اطمینان بخش ہے، حکومت عوام کے جان ومال کے تحفظ کے لئے ہر ممکن اقدام کر رہی ہے۔
انہوں نے کہا کہ وزیر اعظم کی قیادت میں حکومت پہلے سے زیادہ مضبوط ہے اور مدت پوری کرے گی۔
ملاقات کے موقع پر وزیر اعلیٰ پنجاب عثمان بزدار نے کہا کہ سیاست میں رواداری، برداشت اور بھائی چارے کے قائل ہیں، نفاق کے بیج بونے والوں کو پہلے اپنے گریبان میں جھانکنا چاہیے۔
ان کا کہنا تھا کہ ماضی میں سیاسی انتقام کے کلچر کو پروان چڑھایا گیا، الزامات لگانا اور دشنام طرازی ہمارا شیوہ نہیں، ہماری حکومت نے سیاسی انتقام کی منفی سیاست کو ختم کیا ہے۔
انہوں نے یہ بھی کہا کہ منفی رویے اور انتشار کی سیاست ملک کی یکجہتی اور استحکام کیلئے نقصان دہ ہیں۔
خیال رہے کہ گزشتہ روزپشاور میں میڈیا سے گفتگو کرتے ہوئے اپوزیشن اتحاد (پی ڈی ایم) کے سربراہ مولانا فضل الرحمٰن نے کہا تھا کہ قوم 23 مارچ کو اسلام آباد کی طرف مارچ کرے گی، پی ڈی ایم کی تمام جماعتیں 23 مارچ کے مہنگائی مارچ میں پوری قوت کے ساتھ شریک ہوں گی۔
