کراچی: کورونا کیسز کی شرح 35 فیصد سے متجاوز

ملک کے سب سے بڑے شہر کراچی میں کورونا وائرس کے کیسز کی مثبت شرح 35 اعشاریہ 30 فیصد ہو گئی۔

وفاقی حکام کے مطابق کراچی میں گزشتہ روز 8 ہزار 63 کورونا ٹیسٹ کیے گئے جن کے نتیجے میں 2 ہزار 846 افراد میں کورونا کی تشخیص ہوئی ہے۔

وفاقی حکام کا کہنا ہے کہ کراچی میں کورونا وائرس کی تشویش ناک صورتِ حال پر صوبائی ٹاسک فورس کا اجلاس آج 10 بجے ہو گا۔

پاکستان: کورونا شرح 8 فیصد، کُل اموت 29 ہزار سے متجاوز

پاکستان کورونا مریضوں کے حوالے سے مرتب کی گئی فہرست میں 42 ویں نمبر پر آ گیا، تاہم یہاں کورونا کیسز کی شرح میں مسلسل اضافہ ہو رہا ہے اور یہ گزشتہ 24 گھنٹوں کے دوران بڑھ کر 8 فیصد سے زائد ہو گئی۔

ادھر راولپنڈی میں کورونا کے مثبت کیسز کی شرح 9 اعشاریہ 94 فیصد، لاہور میں 8 اعشاریہ 5 فیصد اور اسلام آباد میں 6 اعشاریہ 95 فیصد ریکارڈ کی گئی۔

آزاد جموں و کشمیر کے دارالحکومت مظفر آباد میں کورونا وائرس کے مثبت کیسز کی شرح 11 اعشاریہ 90 فیصد ریکارڈ کی گئی۔

ملکی سطح پر کورونا وائرس کے کیسز کی مثبت شرح 8 اعشاریہ 16 فیصد تک پہنچ گئی ہے۔