فرمان الہی
نماز کے اوقات
پاکستان کرکٹ بورڈ نے اعلان کیا ہے کہ ٹک ٹاک اسپانسرڈ پاکستان بمقابلہ آسٹریلیا ٹیسٹ سیریز کی ٹکٹوں کی فروخت کا آج سے آغاز ہوگیا ہے۔
پی سی بی کے مطابق ٹک ٹاک پاکستان بمقابلہ آسٹریلیا ٹیسٹ سیریز کا آفیشل اسپانسر ہوگا، دونوں ٹیموں کے مابین تاریخی سیریزکا آغاز 4 مارچ کو راولپنڈی سے ہوگا، ٹائٹل اسپانسر کی حیثیت سے ٹک ٹاک کرکٹ مداحوں کو اپنی ایپ پر خصوصی کرکٹ ویڈیوز بنانے کا موقع فراہم کرے گا۔
اس کے علاوہ پی سی بی اس سیریز کے آغاز سے قبل ٹک ٹاک پر اپنا آفیشل اکاؤنٹ بنائے گا، جہاں شائقین کرکٹ کے لیے خصوصی کنٹنٹ اپلوڈ کیا جائے گا۔
اس تاریخی سیریز کے لیے ٹکٹوں کی فروخت آج (25 فروری بروز جمعہ )سے شروع ہوگئی ہے، سیریز کا پہلا ٹیسٹ 4 سے 8 مارچ تک راولپنڈی، دوسرا 12 سے 16 مارچ کراچی اور تیسرا ٹیسٹ 21 سے 25 مارچ تک لاہور میں کھیلا جائے گا۔
پاک آسٹریلیا سیریزکے لیے ٹکٹوں کی قیمتیں مندرجہ ذیل ہیں
• جنرل: 100 روپے
• فرسٹ کلاس: 200 روپے
• پریمیم: 350 روپے
• وی آئی پی: 500 روپے
سیریز کی ٹکٹیں 25 فروری سے بک می کی آفیشل ویب سائٹ پر دستیاب ہوں گی، اس کے علاوہ ایم اینڈ پی کوریئر کے آؤٹ لیٹس پر بھی ٹکٹیں دستیاب ہونگی، تمام ٹکٹ ہولڈرز کے لیے ضروری ہے کہ وہ اسٹیڈیم میں داخلے کے وقت اپنا شناختی کارڈ اور مکمل ویکسینیشن سرٹیفیکٹ اپنے ہمراہ رکھیں۔
پہلے مرحلے میں 50 فیصد ٹکٹیں فروخت کی جائیں گی، جس کے بعد این سی او سی سے تماشائیوں کی تعداد میں وضاحت کے بعد باقی ٹکٹیں فروخت کے لیے پیش کی جائیں گی۔
پی سی بی چیف ایگزیکٹو فیصل حسنین
پاکستان کرکٹ بورڈ کے چیف ایگزیکٹو فیصل حسنین کا کہنا ہے کہ ایچ بی ایل پی ایس ایل کے ذریعے پی سی بی اور ٹک ٹاک کے درمیان ایک بہترین رشتہ قائم ہوچکا ہے، اس حوالے سے آسٹریلیا کے 24 سال بعد دورہ پاکستان میں شامل ٹیسٹ سیریز کی آفیشل اسپانسرشپ حاصل کرنے پر وہ ٹک ٹاک کو مبارکباد پیش کرتے ہیں۔
ٹک ٹاک برانڈ مارکیٹنگ ہیڈ برائے پاکستان پاؤل کاترب
ٹک ٹاک کے ہیڈ آف برانڈ مارکیٹنگ برائےمشرق وسطیٰ، ترکی، افریقہ اور پاکستان پاؤل کاترب کا کہناہے کہ وہ پاکستان بمقابلہ آسٹریلیا ٹیسٹ سیریز کی ٹائٹل اسپانسرشپ حاصل کرنے پر بہت خوش ہیں۔
انہوں نے کہا کہ ٹک ٹاک ایک ایسا پلیٹ فارم ہے جہاں صارفین ایک منفرد انداز سے اپنے پسندیدہ کھیل کو فالو کرتے ہیں۔
پاؤل کاترب کا کہنا تھا کہ وہ پرامید ہیں کرکٹ کے مداح پاکستان بمقابلہ آسٹریلیا سیریز کے دوران ٹک ٹاک پر دستیاب دلچسپ کنٹنٹ سے محظوظ ہوں گے۔
