سندھ بار کونسل 5 اپریل کو صوبے بھر میں عدالتوں کا بائیکاٹ کرے گی

سندھ بار کونسل نے وزیر اعظم کے خلاف تحریک عدم اعتماد مسترد کئے جانے اور اسمبلی تحلیل کرنے کے عمل کو غیر آئینی قرار دیتے ہوئے کل سندھ بھر کی عدالتوں میں ہڑتال اور احتجاج کا اعلان کیا ہے۔

وائس چیئرمین سندھ بار کونسل ذوالفقار جلبانی کا کہنا ہے کہ وزیراعظم کے خلاف تحریک عدم اعتماد غیر آئینی طریقے سے مسترد کی گئی جبکہ صدر کی جانب سے اسمبلی تحلیل کرنے کا عمل بھی غیر قانونی ہے، جس پر سندھ بار کونسل 5 اپریل کو صوبے بھر میں عدالتوں کے بائیکاٹ کرے گی۔

 اعلامیہ میں صوبے بھر کے وکلاء سے 5 اپریل کو عدالتوں میں پیش نہ ہونے اور اپنے اپنے علاقوں میں احتجاجی ریلیاں نکالنے کا کہا گیا ہے۔

وائس چیئرمین سندھ بار کونسل ذوالفقار جلبانی کا کہنا ہے سندھ بار کونسل نے غیر قانونی اقدام کے خلاف سپریم کورٹ میں درخواست بھی دائر کردی ہے۔