عمران خان کی برطرفی پر جمائما کا ’ذومعنی‘ ٹوئٹ

11 اپریل ، 2022

چیئرمین پاکستان تحریکِ انصاف (پی ٹی آئی) عمران خان کے وزیراعظم پاکستان کے منصب سے برطرفی کے بعد سابقہ اہلیہ جمائما گولڈاسمتھ نے بھی ’ذو معنی‘ ٹوئٹ شیئر کیا ہے۔

جمائما نے لندن میں ایون فیلڈ کے سامنے ن لیگ کے کارکنان کے احتجاج کی ایک ویڈیو پر جواب دیا۔

شیئر کی گئی ویڈیو کے ٹوئٹ میں تحریر تھا کہ ’ایون فیلڈ کے سامنے ہجوم ’قاسم کا باپ چور ہے‘ کے نعرے بلند کررہے ہیں۔‘

اس ٹوئٹ میں مریم نواز اور عمران خان کو بھی ٹیگ کیا گیا تھا، جواب میں جب جمائما نے ہیش ٹیگ ’پُرانا پاکستان‘ لکھا تو جمائما کا ٹوئٹ دونوں رہنماؤں کے ساتھ بھی شیئر ہوا۔

قابلِ ذکر امر یہ ہے کہ جمائما نے اپنے اس ٹوئٹ پر تبصروں کو محدود رکھا، اس ٹوئٹ پر انہیں ’رپلائی‘ نہیں دیا جاسکتا لیکن سوشل میڈیا صارفین اس ٹوئٹ پر ’قوٹ‘ کا آپشن استعمال کرتے ہوئے اپنا اپنا ردعمل دے رہے ہیں۔

جمائما کے بھائی کا عمران خان کی برطرفی پر ردعمل

اس سے قبل جمائما کے بھائی نے بھی تحریکِ عدم اعتماد کے نتیجے میں منصب سے فارغ ہونے والے عمران خان کی حمایت میں ٹوئٹ کیا تھا۔

عمران خان کی برطرفی کے بعد بین گولڈ اسمتھ نے اپنے ٹوئٹ میں عمران خان کو ’اچھا اور معزز آدمی‘ قرار دیتے ہوئے لکھا کہ عمران خان صرف اپنے ملک کیلئے اچھے سے اچھا کرنے کی شدید خواہش رکھتے ہیں۔