بیلا حدید امریکی خاتون صحافی کے سوگواروں پر اسرائیلی فورسز کےحملہ آور ہونے پر برہم

15 مئی ، 2022

فلسطینی نژاد امریکی سپر ماڈل بیلا حدید نے امریکی خاتون صحافی شیریں ابوعاقلہ کی آخری رسومات میں شامل ہونے والے سوگواروں پر اسرائیلی فورسز کےحملہ آور ہونے پر اظہارِ برہمی کیا ہے۔

بیلا حدید نے فوٹواینڈ ویڈیو شیئرنگ ایپ انسٹاگرام پر فلسطینی نژاد امریکی خاتون صحافی شیریں ابوعاقلہ کی آخری رسومات سے چند ویڈیوز شیئر کی ہیں۔

ان ویڈیوز میں فلسطینی نژاد امریکی خاتون صحافی کی آخری رسومات میں شامل سوگواروں پر اسرائیلی فورسز حملہ آور ہوتے ہوئے نظر آرہی ہیں۔

بیلا حدید نے یہ ویڈیوز شیئر کرتے ہوئے لکھا کہ’یہ قبضّہ ہے۔‘

اُنہوں نے مزید لکھا کہ’اسرائیلی فوجیوں کے قبضے میں فلسطینیوں کو اس قسم کی اذیت اور زیادتی کا سامنا ہے۔‘

اُنہوں نے لکھا کہ’اس بات سے کوئی فرق نہیں پڑتا ہے کہ آپ کون ہیں، آپ یہ سب کیسے دیکھ سکتے ہیں اور دیکھ کر غصے میں چیختے نہیں اور نا ہی دردناک آنسو روتے ہیں؟‘

اُنہوں نے مزید لکھا کہ’آپ اپنی ماں، باپ، دادا، بہن، بھائی کو ہمارے لوگوں کی نظروں میں کیسے نہیں دیکھ سکتے؟! آپ کیوں نہیں دیکھ سکتے؟‘

بیلا حدید نے لکھا کہ’اسپتال سے آخری رسومات کے لیے چرچ لے جاتے ہوئے، ناصرف شیرین جیسی لیجنڈری خاتون صحافی کو بے عزت ہوتے اور اس طرح پھینکتے ہوئے دیکھا بلکہ ہمارے سوگوار بزرگوں اور لوگوں کو چاروں طرف سے گالیاں سنتے ، دھکم پیل کا شکار ہوتے، اور اپنی جانوں کے لیے خوفزدہ ہوتےہوئے دیکھا!‘

اُنہوں نے لکھا کہ’ اپنے کسی پیارے کا سوگ منانے والے لوگوں سے آپ کو کس قسم کا خطرہ ہے؟ یہ سب ایک فلسطینی لیجنڈ کی آخری رسومات ادا کرنے کے لیے جمع ہوئے ہیں۔‘

اُنہوں نے مزید لکھا کہ ’کسی بھی چیز سے بالاتر، وہ ایک انسان ہے۔ آپ اس طرح کیا چھپانا چاہتے ہیں کہ آپ ہمارے صحافیوں کو مارتے رہتے ہیں۔‘

یہ سب اس فوجی نظام، ان کی حکومت اور جغرافیائی سیاسی کھیل کے بارے میں کرنے کے لیے کافی ہے جو کہ وہ اپنے لوگوں پر بھی زبردستی مسلط کرتے ہیں۔

سپر ماڈل نے کچھ گھنٹے قبل ایک اور ویڈیو اپنے انسٹا اکاؤنٹ پر شیئر کی ہے جس میں دیکھا جاسکتا ہے کہ امریکی خاتون صحافی کی آخری رسومات میں فلسطینی جھنڈے ہاتھوں میں تھامے بڑی تعداد میں فلسطینی شہریوں نے شرکت کی۔