فرمان الہی
نماز کے اوقات
چیئرمین پاکستان تحریک انصاف (پی ٹی آئی) اور سابق وزیراعظم عمران خان نے الزام لگایا ہے کہ حکومت اسرائیل کو تسلیم کرنے جارہی ہے۔
چارسدہ میں ورکرز کنونشن سے خطاب میں عمران خان نے کہا کہ ہم پھر نکلیں گے، اس بار حق نہ دیا گیا تو ہم چھین لیں گے۔
انہوں نے کہا کہ چوروں اور امریکی غلاموں کو کسی صورت قبول نہیں کریں گے، ہم سپریم کورٹ آف پاکستان سے کہہ رہے ہیں، ہمیں ہمارا حق دیا جائے۔
پی ٹی آئی چیئرمین نے لانگ مارچ کے دوران حکومت کی طرف سے تحریک انصاف کے کارکنوں پر تشدد کا الزام دہرایا۔
عمران خان نے مزید کہا کہ آئی جی پنجاب، آئی جی اسلام آباد سمیت ایک ایک کی تصویر آنکھوں کے سامنے ہے، ہم انہیں ہرگز نہیں چھوڑیں گے۔
اُن کا کہنا تھا کہ احتجاج کے دوران مردان اور لاہور کے 2 کارکن اللّٰہ کی راہ میں اور آزادی کی جدوجہد میں شہید ہوئے ہیں۔
پی ٹی آئی چیئرمین نے یہ بھی کہا کہ رانا ثناء اللّٰہ، شریف مافیا اور ظلم کرنے والے پولیس افسر نہیں بچیں گے، جب تک زندہ ہوں کسی صورت جہاد ختم نہیں کروں گا۔
انہوں نے کہا کہ ساری قوم کو تیار کر رہا ہوں، ایک ایک چیز کی تیاری کریں گے، شہباز شریف، حمزہ شہباز اور رانا ثناء اللّٰہ نے جو قوم پر ظلم کیا ہے، اسے معاف نہیں کریں گے۔
عمران خان نے کہا کہ آپ کو انصاف کے کٹہرے میں کھڑا کر کے جیلوں میں ڈلوائیں گے، سپریم کورٹ سے کہہ رہے ہیں ہمارا حق دیا جائے۔
اُن کا کہنا تھا کہ آئی ایم ایف کے کہنے پر پٹرول اور ڈیزل کی قیمتیں بڑھائی گئیں، روس سے 30 فیصد سستا تیل لینے کا معاہدہ انہوں نے ختم کیا۔
سابق وزیراعظم نے مزید کہا کہ یہ ہر وہ کام کریں گے، جسے کرنے کے لیے امریکا کہے گا، بھارت آزاد ہے اور یہ غلام ہیں۔
انہوں نے کہا کہ یہ بھارت سے کشمیریوں کے خون پر سمجھوتہ کریں گے، یہ اسرائیل کو بھی تسلیم کرنے جارہے ہیں۔
عمران خان نے کہا کہ ایک پاکستانی وفد پہلی مرتبہ اسرائیل گیا ہے، پاکستانی ٹیلی وژن کا تنخواہ دار بھی وفد میں شامل تھا۔
