سپریم کورٹ نے پی ٹی آئی کی لانگ مارچ کے لیے پیشگی درخواست واپس کردی

سپریم کورٹ نے پاکستان تحریک انصاف (پی ٹی آئی)  کی لانگ مارچ کے لیے پیشگی درخواست واپس کردی۔ رجسٹرار سپریم کورٹ نے درخواست اعتراض لگا کر واپس کی۔

اعتراض میں کہا گیا ہے کہ سپریم کورٹ اس معاملے پر پہلے ہی فیصلہ دے چکی ہے، درخواست گزار کی جانب سے متعلقہ فورم سے رجوع نہیں کیا گیا۔

پی ٹی آئی کارکنوں کی گرفتاریوں، راستوں کی بندش کیس کا تحریری فیصلہ

چیف جسٹس عمر عطا بندیال نے تحریری فیصلہ جاری کیا، جسٹس یحیٰی آفریدی نے فیصلے میں اختلافی نوٹ پیش کیا۔

اعتراض میں کہا گیا ہے کہ درخواست میں متعقلہ فورم سے رجوع کرنے کی وجہ نہیں بتائی گئی، درخواست کے پیرا 4، 5، 12 اور 14 میں متنازع معاملات کو اٹھایا گیا۔

واضح رہے کہ گزشتہ روز پی ٹی آئی کی جانب سے اسلام آباد میں احتجاج کے لیے سپریم کورٹ میں درخواست دائر کی گئی تھی، درخواست میں استدعا کی گئی تھی کہ عدالت حکم دے کہ پی ٹی آئی کو اسلام آباد میں پر امن احتجاج اور اجتماع کی اجازت دی جائے۔

پی ٹی آئی کے سیکریٹری جنرل اسد عمر کی جانب سے سپریم کورٹ میں دائر آئینی درخواست میں وزارت داخلہ، آئی جی اسلام آباد، صوبائی ہوم سیکریٹریز کو فریق بنایا گیا۔

اسد عمر کی درخواست میں کہا گیا تھا کہ احتجاج کے راستے میں کسی شہر میں رکاوٹیں نہ کھڑی کی جائیں، پی ٹی آئی کے کسی کارکن اور رہنما کو گرفتار یا اس پر تشدد نہ کیا جائے۔

درخواست کے متن میں مزید کہا گیا تھا کہ کارکنان کے گھروں پر چھاپے نہ مارے جائیں اور احتجاج اور دھرنے میں شرکت کرنے والوں کے خلاف طاقت کا استعمال نہ کیا جائے۔