فرمان الہی
نماز کے اوقات
بھارتی پنجابی گلوکار شبھ دیپ سنگھ سدھو عرف سدھو موسے والا کے قتل کے بعد کی نئی سی سی ٹی وی فوٹیج سامنے آگئی جس میں دکھایا گیا ہے کہ کس طرح حملہ آور گلوکار کو قتل کرنے کے بعد فرار ہو رہے تھے۔
بھارتی میڈیا رپورٹس کے مطابق گلوکار سدھو موسے والا کے بہیمانہ قتل کے چند روز بعد ایک اور سی سی ٹی وی فوٹیج سامنے آئی ہے، ویڈیو میں دو سفید گاڑیوں کو گاؤں سے باہر نکلتے ہوئے دیکھا جا سکتا ہے۔
ویڈیو فوٹیج کو ایک سی سی ٹی وی کیمرے سے حاصل کیا گیا جو جائے وقوعہ سے چند میٹر کے فاصلے پر تھا، یہ فوٹیج مبینہ طور پر جواہر گاؤں کے قریب ایک سی سی ٹی وی کیمرے سے لی گئی تھی۔
اطلاعات کے مطابق سدھو موسے والا کو مبینہ طور پر قتل کرنے والے حملہ آور گاڑیوں میں موجود تھے۔ فوٹیج میں پہلے ایک سفید رنگ کی گاڑی وہاں سے گزرتی ہے اور پھر ایک اور سفید رنگ کی گاڑی کو جائے وقوعہ سے فرار ہوتے ہوئے دیکھا گیا ہے۔
دوسری جانب گینگسٹر لارنس بشنوئی نے سدھو موسے والا کے قتل کا اعتراف کرتے ہوئے دہلی پولیس سے کہا کہ ’ہاں! میرے گینگ کے رکن نے سدھو موسے والا کو مارا۔‘
گینگسٹر لارنس بشنوئی نے کہا کہ وکی مڈوکھیرا اُن کا بڑا بھائی تھا اور اُن کے گینگ نے وکی کی موت کا بدلہ لیا۔
اگرچہ لارنس بشنوئی نے اعتراف کیا کہ اُن کا گینگ پنجابی گلوکار کے قتل میں ملوث تھا لیکن اُنہوں نے خود کو اس واقعے سے الگ کر لیا۔
انہوں نے کہا کہ یہ میرا کام نہیں ہے، میں جیل میں تھا اور اپنا فون بھی استعمال نہیں کر رہا تھا۔
