عیدالاضحیٰ پر کراچی میں تیز بارش متوقع

30 جون ، 2022

چیف میٹرولوجسٹ سردار سرفراز نے بارش کے حوالے سے ملک کے سب سے بڑے شہر کراچی کے شہریوں کو خبردار کر دیا۔

’جیو نیوز‘ سے گفتگو کرتے ہوئے ان کا کہنا ہے کہ عیدالضحیٰ کے دنوں میں بھی کراچی سمیت سندھ کے مختلف علاقوں میں تیز بارشیں متوقع ہیں۔

چیف میٹرولوجسٹ سردار سرفراز کا کہنا ہے کہ رواں مون سون میں معمول سے زائد بارشیں متوقع ہیں۔

تیز بارش سے اربن فلڈنگ کا خطرہ

انہوں نے بتایا کہ بارشوں کی زیادہ شدت یکم جولائی سے 15 اگست تک رہے گی،7 جولائی کو دوسرا مون سون سسٹم ملک پر اثر انداز ہو گا۔

چیف میٹرولوجسٹ سردار سرفراز کا کہنا ہے کہ کراچی میں 2 جولائی سے تیز بارش کا امکان ہے جس سے اربن فلڈنگ کا بھی خطرہ ہے۔

سردار سرفراز نے بتایا کہ کراچی میں آج اور کل مطلع جزوی ابر آلود رہنے کا امکان ہے۔

ان کا کہنا ہے کہ کراچی میں صبح اور رات میں ہلکی بارش کا امکان ہے، تاہم مون سون کے پہلے اسپیل کی شدت سندھ میں زیادہ رہے گی۔

بارش سے قبل آندھی بھی چل سکتی ہے

سردار سرفراز نے بتایا ہے کہ کراچی میں 2 جولائی کی شام یا رات سے وقفے وقفے سے تیز بارش ہو سکتی ہے، شہرِ قائد میں بارش سے قبل آندھی بھی چل سکتی ہے۔

انہوں نے بتایا کہ آندھی کے دوران کراچی میں ہوا کی رفتار 81 کلو میٹر فی گھنٹہ تک ہو سکتی ہے۔

چیف میٹرولوجسٹ سردار سرفراز کے مطابق مون سون کا سسٹم کراچی کو چھوتا ہوا گزرا تو اس سے 50 سے 70 ملی میٹر بارش ہو سکتی ہے۔

100 ملی میٹر بارش کا امکان

انہوں نے بتایا کہ مون سون کے اس سسٹم کا مرکز اگر کراچی سے گزرا تو یہاں 100 ملی میٹر سے زائد بارش ہو سکتی ہے، جس سے شہر میں اربن فلڈنگ کا خطرہ ہے۔

چیف میٹرولوجسٹ کے مطابق کراچی سے متصل سمندر میں 3 سے 5 جولائی کے دوران طغیانی رہے گی، اس دوران ماہی گیر محتاط رہیں۔

محکمۂ موسمیات کے مطابق خلیجِ بنگال اور بحیرۂ عرب سے نم ہوائیں گزشتہ رات سیالکوٹ اور نارووال میں داخل ہوئی ہیں۔

محکمۂ موسمیات نے یہ بھی بتایا ہے کہ آج یہ ہوائیں مزید شدت کے ساتھ ملک کے بالائی علاقوں میں داخل ہوں گی، جبکہ 2 جولائی سے یہ ہوائیں مشرقی سندھ پر اثر انداز ہوں گی۔