امریکا کا پی ٹی آئی اہلکار کے ڈونلڈ لُو سے رابطے پر بات سے گریز

05 جولائی ، 2022

امریکی محکمہ خارجہ نے پاکستان تحریک انصاف ( پی ٹی آئی) کے سیکریٹری اوور سیز عبداللّٰہ ریار کے ڈونلڈ لُو کے ساتھ مبینہ رابطے کے بارے میں بات کرنے سے گریز کیا ہے۔

میڈیا کی جانب سے رابطہ کرنے پر ترجمان امریکی محکمہ خارجہ کا کہنا تھا کہ ہم نجی سفارتی ملاقاتوں پر تبصرہ نہیں کرتے۔

اس سے قبل پی ٹی آئی کے سیکرٹری اوور سیز چیپٹر ڈاکٹر عبداللّٰہ ریار نے مبینہ طور پر نائب امریکی وزیر خارجہ ڈونلڈ لُو سے رابطہ کر کے کہا تھا کہ ماضی بُھلائیں اور آگے بڑھیں۔

یاد رہے کہ وزیر دفاع خواجہ آصف نے انکشاف کیا تھا کہ تحریک انصاف نے امریکی سفارت کار ڈونلڈ لُو سے معافی مانگ لی ہے، ملاقات اور امریکی حکومت سے معافی کے شواہد سامنے آچکے ہیں، پاکستان میں امریکا کے خلاف نعرے لگانے والا امریکا کے پیر پکڑ رہا ہے۔