• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جگنو محسن کے والد سید محمد محسن کرمانی سپرد خاک، وزیراعظم، زرداری، حمزہ کا اظہار تعزیت

آج کا اخبار
ملک بھر سے
14 جولائی ، 2022
اوکاڑہ(نمائندہ جنگ) رکن پنجاب اسمبلی جگنو محسن کے والد،سینئر تجزیہ نگار و سابق نگران وزیر اعلیٰ نجم سیٹھی کے سسر،تحریک پاکستان کو معاشی طور پر سپورٹ کرنے والے رہنما سید مراتب علی کے داماد،ممتاز صنعتکار سید بابر علی شاہ کے بہنوئی مچلز فروٹ فارمز کے چیئرمین سید محمد محسن کرمانی المعروف میاں محسن کو انکے آبائی قبرستان شیرگڑھ (اوکاڑہ) میں سپرد خاک کر دیا گیا نماز جنازہ جامعہ مسجد داؤد بندگی شیرگڑھ میں ادا کی گئی جس میں ن لیگ کے ارکان قومی اسمبلی راؤ محمد اجمل خان،چودھری ندیم عباس ربیرہ،رکن پنجاب اسمبلی چودھری جاوید علاؤ الدین،سابق ممبر پنجاب اسمبلی ملک محمد اکرم بھٹی،سابق ایم پی اے و ن لیگ کے ضلعی صدر میاں محمد منیر،ڈی پی او حسن اقبال،ڈی سی زاہد پرویز وڑائچ،ضلعی انتظامیہ کے افسران، سیاسی، مذہبی، سماجی،تجارتی رہنماؤں سمیت ہزاروں افراد نے شرکت کی،جنازہ کے موقع پر سابق وفاقی وزیر و امریکہ میں پاکستان کی سابق سفیر عابدہ حسین بھی موجود تھیں،نماز جنازہ کے دوران لوگوں کی اکثریت مرحوم سید محمد محسن کرمانی کی غریبوں کے لئے کی جانے والی خدمات کو یاد کر کے روتے رہے جبکہ مرحوم کی بیٹیاں ایم پی اے جگنو محسن اور موہنی محسن تدفین تک مسلسل روتی رہیں،بتایا جاتا ہے کہ مرحوم سید محمد محسن کرمانی نے شیرگڑھ میں تعلیمی اور صحت کے میدان میں بے پناہ سماجی خدمات سر انجام دیں،اندرون اور بیرون ملک انسانیت کے لئے کی جانے والی خدمات کی وجہ سے سید محمد محسن کرمانی عالمی شہرت رکھتے تھے،ایم پی اے جگنو محسن نے روتے ہوئے ”جنگ“ کو بتایا کہ میری والدہ محترمہ سیدہ سطوت محسن کی وفات حسرت آیات کے 100دن بعد ان کے شفیق،مہربان اور قابل فخر والد محترم چل بسے،ہماری تو دنیا ویران ہو گئی ہے،جگنو محسن کا کہنا تھا کہ علاقہ کے لوگوں نے میرے مرحوم والد کی خدمات کا جس طرح اعتراف کیا اس نے ثابت کر دیا کہ سید محمد محسن کرمانی معاشرے کا مشترکہ اثاثہ تھے جن کے انتقال سے معاشرہ اس عظیم اثاثہ سے محروم ہو گیا ہے،ادھر وزیر اعظم پاکستان میاں شہباز شریف،وزیر اعلیٰ پنجاب میاں حمزہ شہباز،سابق صدر پاکستان آصف علی زرداری،سپیکر پنجاب اسمبلی چودھری پرویز الٰہی،سابق وزیر خزانہ و سینٹر اسحاق ڈار اور میاں نواز شریف کے بیٹے حسین نواز شریف نے جگنو محسن کو ٹیلی فون کر کے ان سے ان کے والد سید محمد محسن کرمانی کے انتقال پر دلی تعزیت کا اظہار کرتے ہوئے مرحوم کے لئے دعائے مغفرت کی،مرحوم سید محمد محسن کرمانی کی رسم قل کل بعد از نماز جمعہ مچلز فروٹ فارمز رینالہ خورد میں ادا کی جائیگی۔
ملک بھر سے سے مزید