مون سون کی شدت برقرار، آج بھی کراچی میں بارش متوقع

18 اگست ، 2022

چیف میٹرولوجسٹ سردار سرفراز نے پیش گوئی کی ہے کہ ملک کے سب سے بڑے شہر کراچی میں مون سون سسٹم کی شدت برقرار ہے، جس کے تحت آج بھی یہاں بارش متوقع ہے۔

انہوں نے بتایا ہے کہ مون سون کے سسٹم کا کچھ حصہ راجستھان اور مشرقی سندھ پر موجود ہے، اس سسٹم کا پھیلاؤ وسطی سندھ اور بلوچستان تک آ رہا ہے۔

چیف میٹرولوجسٹ نے بتایا ہے کہ آج بھی کراچی سمیت مشرقی سندھ میں گرج چمک کے ساتھ بارش متوقع ہے، جبکہ رات تک بارش کا سلسلہ وقفے وقفے سے جاری رہنے کا امکان ہے۔

ان کا کہنا ہے کہ کل رات تک سسٹم کے زیرِ اثر سندھ کے بیشتر مقامات پر بارش جاری رہے گی۔

سردار سرفراز نے بتایا کہ اس سسٹم کے زیرِ اثر نواب شاہ، سکھر، لاڑکانہ، جیکب آباد اور دادو میں 20 اگست کی صبح تک بارش جاری رہنے کا امکان ہے۔

ان کا مزید کہنا ہے کہ اس سسٹم کے زیرٍ اثر ہونے والی بارشوں سے شہری علاقوں میں اربن فلڈنگ کا خدشہ ہے۔

چیف میٹرولوجسٹ سردار سرفراز کا یہ بھی کہنا ہے کہ بلوچستان میں 21 اگست کی شام یا رات تک بارش کا سلسلہ وقفے وقفے سے جاری رہنےکا امکان ہے۔

کل سے آج صبح تک کراچی میں کتنی بارش ہوئی؟

دوسری جانب محکمۂ موسمیات نے کراچی میں کل صبح 8 بجے سےآج صبح 8 بجے تک ہونے والی بارش کے اعداد و شمار جاری کر دیے۔

ان اعداد و شمار کے مطابق شہر میں سب سے زیادہ بارش گلشنِ حدید میں 102 اعشاریہ 2 ملی میٹر ریکارڈ ہوئی ہے۔

محکمۂ موسمیات کے مطابق صدر میں 60، قائد آباد میں 49، یونیورسٹی روڈ پر 44 اعشاریہ 7، گڈاپ ٹاؤن 37 اعشاریہ 4، سعدی ٹاؤن میں 30 اعشاریہ 1، اورنگی ٹاؤن میں 8 اعشاریہ 7 ملی میٹر بارش ریکارڈ کی گئی ہے۔

جناح ٹرمینل پر 21 اعشاریہ 4، اولڈ ایئر پورٹ پر 19 اعشاریہ 1، فیصل بیس پر 13، ناظم آباد میں 13 اعشاریہ 2 ملی میٹر بارش ریکارڈ ہوئی ہے۔

اسی طرح گلشنِ معمار میں 12، سرجانی ٹاؤن میں 11 اعشاریہ 7، ڈی ایچ اے میں 11 اعشاریہ 3، کیماڑی میں 10، نارتھ کراچی میں 9 اعشاریہ 4 اور کورنگی میں 24 اعشاریہ 7 ملی میٹر بارش ریکارڈ کی گئی۔

قومی خبریں سے مزید