فرمان الہی
نماز کے اوقات
دورۂ بلوچستان کے دوران وزیراعظم شہباز شریف نے طالبِ علم سے کِیا وعدہ پورا کر دیا۔
رواں ماہ کے آغاز میں مون سون بارشوں کے نتیجے میں وزیر اعظم شہباز شریف کی جانب سے بلوچستان کے سیلاب زدگان علاقوں کا دورہ کیا گیا تھا۔
اس دوران وزیرِ اعظم شہباز شریف کی ایک نوعمر طالبِ علم سے ملاقات ہوئی تھی، پڑھائی سے لگاؤ رکھنے والے اس طالبِ علم نے وزیر اعظم سے ناقص تعلیم کے نظام کی شکایت کی تھی جس پر شہباز شریف نے اس بچے کی شکایت کے ازالے کا حکم دیا تھا۔
پڑھائی سے بے حد لگاؤ رکھنے والے اس بچے کو اب لارنس کالج مری میں داخلہ مل گیا ہے۔
بچے سے وعدہ وفا کیے جانے کی یہ خوشخبری مریم نواز کے پولیٹیکل سیکریٹری ذیشان ملک کی جانب سے اپنے سوشل میڈیا اکاؤنٹ ٹوئٹر پر شیئر کی گئی ہے۔
ذیشان ملک کا بتانا ہے کہ الحمدللّٰہ، وزیراعظم نے بچے سے اعلیٰ تعلیم کا جو وعدہ کیا تھا وہ وعدہ وفا بھی کیا، لارنس کالج گھوڑا گلی مری میں باقاعدہ ایڈمیشن سے اس ہونہار کے ایک نئے تعلیمی سفر کے آغاز ہوچکا ہے۔
انہوں نے مزید لکھا کہ انشاءاللّٰہ یہ بچہ اعلیٰ تعلیم حاصل کرکے ملک و قوم کا نام روشن کرے گا۔
واضح رہے کہ وزیراعظم شہباز شریف نے وزیراعلیٰ بلوچستان میر عبدالقدوس بزنجو اور وفاقی وزراء کے ہمراہ بلوچستان کے سیلاب سے متاثرہ علاقوں کا دورہ کیا تھا۔
اس دوران بچے نے اپنے علاقے میں ناقص تعلیم کے نظام کی شکایت کی تھی۔
