غربت کے خاتمے کا عالمی دن

ہر سال 17اکتوبر کو پاکستان سمیت دنیا بھر میں غربت کے خاتمے کا عالمی دن منایا جاتا ہے۔ یہ دن منانے کا آغاز 1993ء سے ہوا، جس کا مقصد پوری دنیا بالخصوص ترقی پذیر ممالک میں غربت کے خاتمے کے لیے عالمی برادر ی میں احساس پیدا کرنا اور اس کے لیے مشترکہ حکمت عملی ترتیب دینا ہے۔ اس دن دنیا بھر میں غربت، محرومی اور عدم مساوات کے خاتمے، غریب عوام کی حالت زار اور ان کی فلاح و بہبود کے منصوبوں کی اہمیت کو اجاگر کرنے کا پیغام دیا جاتا ہے۔ یہ دن غربت میں زندگی گزارنے والے لوگوں کی کوششوں اور جدوجہد کو تسلیم کرنے کا بھی موقع فراہم کرتا ہے۔

2022ء تھیم: عملی طور پر سب کیلئے وقار

اقوام متحدہ کے زیرِ اہتمام منائے جانے والے غربت کے خاتمے کے عالمی دن کا 2022ء -2023ء کے لیے مرکزی موضوع، ’’عملی طور پر سب کے لیے وقار‘‘ ہے۔ انسان کا وقار نہ صرف اپنے آپ میں ایک بنیادی حق ہے بلکہ دیگر تمام بنیادی حقوق کی بنیاد ہے۔ لہٰذا، ’وقار‘ ایک تجریدی تصور نہیں ہے، یہ ہر ایک سے تعلق رکھتا ہے۔ آج، مسلسل غربت میں رہنے والے بہت سے لوگ اپنے وقار کو ٹھکرائے جانے اور بے عزت ہونے کا تجربہ کرتے ہیں۔ 

غربت کے خاتمے، کرہ ارض کی حفاظت اور تمام لوگوں کو ہر جگہ امن اور خوشحالی سے لطف اندوز ہونے کو یقینی بنانے کے عزم کے ساتھ، 2030ء کے ایجنڈے نے دوبارہ اسی وعدے کی طرف اشارہ کیا جو انسانی حقوق کے عالمی اعلامیے کے تحت قائم کیا گیا تھا۔ پھر بھی، موجودہ حقیقت یہ ظاہر کرتی ہے کہ 1 ارب 30کروڑ لوگ اب بھی کثیر جہتی غربت میں رہتے ہیں، جن میں سے تقریباً نصف بچے اور نوجوان ہیں۔

مواقع اور آمدنی کی عدم مساوات تیزی سے بڑھ رہی ہے اور ہر سال امیر اور غریب کے درمیان خلیج اور بھی وسیع تر ہوتی جارہی ہے۔ اقوام متحدہ کے مطابق پچھلے ایک سال میں (جب لاکھوں افراد محنت کشوں کے حقوق اور ملازمت کے معیار کے خاتمے کے لیے جدوجہد کر رہے ہیں) کارپوریٹ پاور اور ارب پتی طبقے کی دولت میں غیر معمولی اضافہ ریکارڈ کیا گیا ہے۔ غربت اور عدم مساوات ناگزیر نہیں ہیں۔ یہ جان بوجھ کر کیے گئے فیصلوں یا بے عملی کا نتیجہ ہیں جو ہمارے معاشروں میں غریب اور پسماندہ لوگوں کو بے اختیار کرتے اور ان کے بنیادی حقوق کی خلاف ورزی کرتے ہیں۔ 

سماجی اخراج، ساختی امتیاز اور بے اختیاری - انتہائی غربت میں پھنسے لوگوں کے لیے فرار اور اپنی انسانیت سے انکار کرنا مشکل بنا دیتا ہے۔ دنیا بھر میں 1ارب 60 کروڑ غیر رسمی محنت کش بشمول سڑک پر دکان لگانے والے، گھروں پر کام کرنے والے اور کاشتکار وغیرہ عام طور پر محدود یا بغیر کسی سماجی تحفظ کے ملازمت کی کمزور شکلوں میں کم اجرت یا غیر محفوظ حالات کے ساتھ کام کرتے ہیں۔

وبائی امراض اور موسمی تبدیلی

کووڈ-19وبائی مرض نے سماجی تحفظ کے نظام کے خلاء اور ناکامیوں کے ساتھ ساتھ ساختی عدم مساوات اور امتیاز کی متنوع شکلوں کو بے نقاب کیا، جو غربت کو مزید گہرا اور مستقل بناتی ہیں۔ اقوام متحدہ کے مطابق فی کس گھریلو آمدنی یا کھپت میں کمی کے ذریعے عالمی مالیاتی غربت پر کووڈ-19کے ممکنہ قلیل مدتی معاشی اثرات کے تخمینے ظاہر کرتے ہیں کہ 2030ء تک غربت کے خاتمے کے اقوام متحدہ کے پائیدار ترقی کے ہدف کے لیے کووڈ-19ایک حقیقی چیلنج ہے کیونکہ عالمی سطح پر غربت میں 1990ء کے بعد پہلی بار اضافہ ہوسکتا ہے اور اس طرح کا اضافہ غربت کو کم کرنے میں دنیا کی پیشرفت میں تقریباً ایک دہائی کی کمی لاسکتا ہے۔ کچھ خطوں میں منفی اثرات کے نتیجے میں غربت کی سطح 30 سال پہلے ریکارڈ کردہ سطح تک جاسکتی ہے۔ انتہائی منظر نامے کے تحت، آمدنی یا کھپت میں 20فیصد کمی کے باعث غربت میں رہنے والے لوگوں کی تعداد 42کروڑ سے 58کروڑ تک بڑھ سکتی ہے۔ ممکنہ طور پر، کووڈ-19وبائی مرض نے 2021ء میں 14کروڑ سے 16کروڑ لوگوں کو غربت کی طرف دھکیل دیا ہے۔

اقوام متحدہ کے مطابق درمیانی آمدنی والے ممالک میں بین الاقوامی خط غربت کے نیچے رہنے والے لوگوں کی تعداد میں 2.3 فیصد پوائنٹس کی غربت کی شرح میں اضافہ متوقع ہے۔ متوقع نئے غریب افراد میں سے تقریباً نصف جنوبی ایشیا اور ایک تہائی سے زیادہ سب صحارا افریقا میں ہوں گے۔ موسمیاتی ایمرجنسی غربت میں رہنے والے لوگوں کے لیے نئی مشکلات پیدا کرتی ہے، کیونکہ یہ لوگ قدرتی آفات اور ماحولیاتی انحطاط کے پہلے سے زیادہ ہونے والے واقعات کا غیر ضروری طور پر بوجھ برداشت کرتے ہیں، جس سے ان کے گھروں، فصلوں اور معاش کی تباہی ہوتی ہے۔ پاکستان میں موسمی تبدیلی کے باعث رواں سال ہونے والی شدید بارشوں سے جانی و مالی نقصان برداشت کرنا پڑا۔ فصلوں اور انفرااسڑکچر کو پہنچنے والے نقصان کا تخمینہ 40ارب ڈالر سے زائد لگایا گیا ہے۔

ایک ایسی دنیا میں جہاں معاشی ترقی، تکنیکی ذرائع اور مالی وسائل کی بے مثال سطح کی خصوصیت ہے، لاکھوں افراد انتہائی غربت میں زندگی گزار رہے ہیں۔ غربت صرف ایک معاشی مسئلہ نہیں ہے، بلکہ یہ ایک کثیر جہتی رجحان ہے جس میں آمدنی اور عزت کے ساتھ زندگی گزارنے کی بنیادی صلاحیتوں دونوں کی کمی شامل ہے۔ 

غربت میں رہنے والے افراد بہت سی منسلک اور باہمی طور پر تقویت دینے والی محرومیوں کا تجربہ کرتے ہیں، جو انہیں اپنے حقوق کا ادراک کرنے سے روکتی ہیں اور ان کی غربت کو برقرار رکھتی ہیں، بشمول کام کے خطرناک حالات، غیر محفوظ رہائش، غذائیت سے بھرپور خوراک کی کمی، انصاف تک غیر مساوی رسائی، سیاسی طاقت کی کمی، صحت کی سہولتوں تک محدود رسائی وغیرہ۔

آبادی اور وسائل میں توازن نہ رکھنے والے ممالک میں بیروزگاری کا عام ہونا کوئی اچنبھے کی بات نہیں۔ 2020ء-2021ء کی لیبر سروے رپورٹ کے مطابق پاکستان میں مجموعی لیبر فورس کی تعداد 7کروڑ17لاکھ ہے، جس میں سے 45لاکھ10ہزار افراد بے روزگار ہیں۔ پاکستان میں اوسط ماہانہ تنخواہ 24ہزار28روپے فی کس ہے۔ غریب افراد کو صحت اور تعلیم کی مناسب سہولتیں فراہم کی جائیں تو وہ بھی ملک کی ترقی میں اپنا کردار ادا کرسکتے ہیں۔ 

اس کے علاوہ ملکی وسائل کی منصفانہ تقسیم اور بہتر استعمال سے معیارِ زندگی بلند ہونے کی امیدیں پیدا ہوں گی اور پاکستان کے ہر طبقے کو بنیادی سہولتوں جیسے پینے کا صاف پانی، تعلیم، ادویات، صحت، مناسب خوراک، رہائش، ذرائع آمدورفت اور نکاسی آب وغیرہ کی دستیابی ممکن ہوگی، جس کیلئے انقلابی اقدامات کرنے کی ضرورت ہے۔